फ्रान्समा सरकारविरोधी प्रदर्शन चर्कियो, करिब एक हजार पक्राउ
पेरिस । फ्रान्समा बढ्दो महँगी, आर्थिक असमानता र सरकारको नीतिविरुद्ध भएको बृहत् प्रदर्शनका क्रममा विभिन्न सहरमा झडप हुँदा करिब एक हजार जना पक्राउ परेका छन्। शनिबार देशभर भएको प्रदर्शनमा फ्रान्सको गृह मन्त्रालयका अनुसार करिब चार लाख १० हजार मानिस सहभागी भएका थिए। तर मजदुर सङ्गठनहरूले भने प्रदर्शनमा करिब आठ लाख मानिस सहभागी भएको दाबी गरेका छन्।
दिनभर शान्तिपूर्ण रहेको प्रदर्शन साँझपछि राजधानी पेरिससहित मार्सेई, लियोँ र बोर्डोमा हिंसात्मक बनेको थियो। प्रदर्शनकारीले सडक अवरुद्ध गर्नुका साथै केही स्थानमा आगजनी र तोडफोड गरेका थिए। प्रहरीले भीड नियन्त्रण गर्न अश्रुग्यास र पानीको फोहोरा प्रयोग गरेको थियो।
सम्भावित हिंसा नियन्त्रण गर्न सरकारले देशभर ७० हजार प्रहरी तथा जन्डार्म परिचालन गरेको थियो। झडपमा दुई जना गम्भीर घाइते भएको फ्रान्सका गृहमन्त्री लरेन नुनेजले बताएका छन्। प्रदर्शनकारीहरूले बढ्दो जीवनयापन खर्च, करको भार, आर्थिक असमानता र विद्यालयको कमजोर अवस्थाप्रति असन्तुष्टि जनाएका छन्। विद्यालयको अवस्थाविरुद्ध विद्यार्थीहरूले सुरु गरेको आन्दोलन विस्तार हुँदै सरकारको आर्थिक नीतिविरुद्ध केन्द्रित भएको हो।
यसअघि गत साता भएको प्रदर्शनका क्रममा फ्रान्सभर दुई हजार पाँच सयभन्दा बढी मानिस पक्राउ परेका थिए। उक्त घटनामा दुई हजारभन्दा बढी पसल तथा व्यवसाय प्रभावित भएका थिए भने क्षति सयौँ मिलियन युरो बराबर पुगेको अनुमान गरिएको छ। फ्रान्सबाहिर पनि आन्दोलनको प्रभाव देखिएको छ। बेल्जियमको राजधानी ब्रसेल्स र अल्बानियाको तिरानामा सरकारविरोधी प्रदर्शनका क्रममा प्रहरीसँग झडप भएको छ।
आगामी राष्ट्रपतीय निर्वाचन नजिकिँदै गर्दा चर्किएको आन्दोलनले राष्ट्रपति इमानुएल म्याक्रोंको सरकारमाथि राजनीतिक दबाब बढाएको छ। विपक्षी वामपन्थी नेता जाँ–लुक मेलाँसोंले सामाजिक असन्तुष्टि सम्बोधन नभएसम्म प्रदर्शन जारी रहने बताएका छन्।
