बम विस्फोट घटनामा लेखापढी व्यवसायी पक्राउ
सिरहा, ६ चैत – सिरहा जिल्ला अदालत अगाडि रहेको बार एसोसिएसन कार्यालयमा भएको कुकर बम विस्फोट घटनाको अनुसन्धानका क्रममा प्रहरीले एक जनालाई पक्राउ गरेको छ।
पक्राउ पर्नेमा सुखिपुर नगरपालिका–३ का गुमस्ता यादव रहेको जिल्ला प्रहरी कार्यालयले जनाएको छ। उनी जिल्ला अदालत सिरहा अगाडि नै कार्यालय खोलेर लेखापढी व्यवसाय सञ्चालन गर्दै आएका थिए। उनलाई शङ्काका आधारमा नियन्त्रणमा लिएर अनुसन्धान अघि बढाइएको प्रहरीले जनाएको छ।
जिल्ला प्रहरी कार्यालयका प्रवक्ता तथा प्रहरी नायब उपरीक्षक रमेशबहादुर पालले घटनाबारे विस्तृत अनुसन्धान भइरहेको जानकारी दिए।
“हामीले शङ्काका आधारमा एक जनालाई पक्राउ गरी चार दिनदेखि अनुसन्धान गरिरहेका छौँ,” उनले भने, “अनुसन्धान निष्कर्षमा पुगेपछि मात्र थप विवरण सार्वजनिक गरिनेछ।”
गत फागुन २७ गते बार एसोसिएसनको कार्यालयमा कुकर बम विस्फोट भएको थियो। उक्त घटनामा सौरभ यादव घाइते भएका थिए। उनको खुट्टामा चोट लागेको थियो। विस्फोटका कारण कार्यालयका कम्प्युटरलगायत सामग्रीमा समेत क्षति पुगेको प्रहरीले जनाएको छ।
