विद्यालयको छाना हुरीले उडाएपछि विद्यार्थीहरु चौरमा

जुम्ला, २२ चैत – जुम्लाको तातोपानी गाउँपालिका-८, टोप्ला गाउँको काविका माध्यमिक विद्यालयको छाना हुरीले उडाएको छ।
विद्यालयको छाना हुरीले उडाएपछि विद्यार्थीहरु चौरमा बसेर पढ्न बाध्य भएका छन्। यो विद्यालयमा प्रविणता प्रमाणपत्र तहमा कृषि विज्ञान (आइएस्सीएजी) समेत अध्यापन हुँदै आएको छ। हावाहुरीले भवनको छानो नै उडाएपछि सबै तहको पठनपाठनमा असर परेको छ।
हावाहुरीले गाउँ नजिक खोला किनारमा रहेको कुटानी-पिसानी मिलको छाना पनि उडाइदिएको स्थानीय हरिबहादुर शाहीले बताउनुभयो । समस्यालाई समाधान गरिदिन स्थानीयबासीले सरोकारवाला निकायसँग आग्रह गरेका छन्।