नेपालीलाई इजरायल र इरानबाट उद्धार गर्ने तयारीमा छौँः परराष्ट्रमन्त्री

काठमाडौं, ६ असार – परराष्ट्रमन्त्री डा. आरजु राणा देउवाले इजरायल र इरानमा विकसित युद्धस्थितिपछि ती मुलुकमा रहेका नेपाली नागरिकहरूको सुरक्षा र उद्धारका लागि नेपाल सरकार पूर्ण तयारीमा रहेको बताउनु भएको छ।

आज परराष्ट्र मन्त्रालयमा बसेको परराष्ट्र, श्रम, पर्यटन तथा नागरिक उड्डयन र गृह मन्त्रालयबीचको संयुक्त बैठकमा मन्त्री राणाले हालको संकटप्रति सरकार संवेदनशील रहेको स्पष्ट पार्दै, नेपाल फर्कन चाहने नेपालीहरूको उद्धारका लागि आवश्यक सबै उपाय अवलम्बन गर्ने प्रतिबद्धता व्यक्त गर्नुभयो।

उहाँले जानकारी दिनुभयो कि इजरायलस्थित नेपाली दूतावास सक्रिय रूपमा कार्यरत रहेको छ, उद्धारको तयारीका लागि फिर्ता हुन चाहने नेपालीको विवरण संकलन गर्न अनलाइन रजिस्ट्रेसन खुला गरिएको छ।

इजरायल सरकारलाई आग्रह

डा. राणाले जिटुजी (सरकार–सरकार) समझौताअनुसार इजरायलमा पुगेका नेपालीहरूलाई सुरक्षित स्थानमा जान वा स्वदेश फर्कन चाहेमा सहजीकरण गर्न इजरायल सरकारलाई अनुरोध गरिसकिएको जानकारी दिनुभयो।

उहाँको भनाइमा, “सीमाक्षेत्रबाट अन्य मुलुकमा जानसक्ने वातावरण बनाउन इजरायल सरकार जिम्मेवार हुनुपर्छ।”

श्रममन्त्रीको भनाइ

बैठकमा श्रममन्त्री शरदसिंह भण्डारीले आफ्नो मन्त्रालय पनि ती देशमा रहेका नेपालीहरूसँग नियमित सम्पर्कमा रहेको जनाउँदै, स्वदेश फर्कन चाहनेहरूलाई उद्धार गर्नुपर्ने आवश्यकता औंल्याउनुभयो। साथै, हाल इजरायल जान लागेका व्यक्तिलाई श्रम स्वीकृति रोकिएको जानकारी दिनुभयो।

ट्राभल एड्भाइजरी र कूटनीतिक पहल

• नेपाल सरकारले जुन १३ मा इजरायल–इरानबीच युद्ध सुरु भएपछि तत्कालै संयमता अपनाउन दुवै पक्षलाई आग्रह गर्दै नेपालीलाई सतर्क रहन सुझाव दिएको थियो।

• जुन १५ मा ट्राभल एड्भाइजरी जारी गर्दै त्यहाँ रहेका नेपालीलाई सम्बन्धित दूतावाससँग सम्पर्कमा रहन, भीडभाडबाट टाढा बस्न र सुरक्षित स्थानमा बस्न अनुरोध गरिएको थियो।

• हवाई मार्ग अवरुद्ध भएको अवस्थामा सीमावर्ती मुलुकमा जान चाहनेलाई अनलाइन भिसा प्रक्रियामा सहायता गर्न खाडी क्षेत्रका सबै नेपाली नियोगलाई निर्देशन दिइएको छ।

विवरण संकलन र जनशक्ति तथ्याङ्क

परराष्ट्र मन्त्रालयले हालसम्म ६०० जना भन्दा बढी नेपालीको विवरण अनलाइन पोर्टलमार्फत दर्ता गरिसकेको छ। यो प्रक्रिया जारी नै छ।

इजरायलमा ५,५०० देखि ७,००० नेपाली रहेका छन्, जसमा धेरैजसो तेल अविब, जेरुसेलम र हाइफा क्षेत्रका हुन्। इरानमा भने १८ जना नेपाली रहेको मन्त्रालयको अनुमान छ।

इजरायली राजदूतसँगको छलफल

यसै साता नेपालका लागि इजरायलका राजदूत स्मुलिक आरी बाससँग परराष्ट्रमन्त्री डा. राणाको भेट भएको थियो। सो अवसरमा मन्त्री राणाले नेपाली नागरिकहरूको सुरक्षाको सुनिश्चितता गर्न आग्रह गर्नुभएको हो।

साथै, इजरायलस्थित नेपाली दूतावास र इरान हेर्ने कतारस्थित दूतावासलाई स्थानीय अधिकारी, संघसंस्था तथा नेपाली समुदायसँग सक्रिय सम्पर्क राख्न र ‘रियल टाइम रिपोर्टिङ’ गर्न निर्देशन दिइएको छ।