‘सक्कली बिल लिनुहोस्, लखपति बन्नुहोस्’ योजना लागू, दैनिक १ लाख र मासिक १० लाखसम्म पुरस्कार
काठमाडौँ, ५ साउन – सरकारले मूल्य अभिवृद्धि कर (भ्याट) र स्थायी लेखा नम्बर (प्यान) मा आबद्ध व्यवसायीबाट सामान वा सेवा खरिद गर्दा अनिवार्य रूपमा सक्कली बिल लिन सर्वसाधारणलाई प्रोत्साहित गर्ने उद्देश्यले नयाँ पुरस्कार योजना कार्यान्वयनमा ल्याउने भएको छ।
‘सक्कली बिल लिनुहोस्, लखपति बन्नुहोस्’ नारासहित चालु आर्थिक वर्षको बजेटमार्फत घोषणा गरिएको यो योजनाअन्तर्गत दैनिक एक जना सेवाग्राहीले एक लाख रुपैयाँ पुरस्कार प्राप्त गर्नेछन्। यस्तै, हरेक महिनामा दुई जना भाग्यशाली विजेताले १०/१० लाख रुपैयाँको बम्पर पुरस्कार पाउने व्यवस्था गरिएको सरकारले जनाएको छ।
१०० रुपैयाँभन्दा बढी मूल्यको सामान खरिद गर्दा वा होटल, रेस्टुरेन्ट तथा अन्य सेवा लिँदा प्राप्त हुने सक्कली बिल नम्बरका आधारमा विजेता छनोट गरिनेछ। नगद वा अनलाइन दुवै माध्यमबाट गरिएको भुक्तानीमा प्राप्त सक्कली बिल यस योजनाका लागि मान्य हुनेछ। सरकारले हालका लागि हरेक महिनाको १६ गते र मसान्तमा अर्थात् पाक्षिक रूपमा पुरस्कार घोषणा गर्ने व्यवस्था गरेको छ।
योजनाको सञ्चालन, विजेता छनोट प्रक्रिया तथा अन्य कानुनी व्यवस्थालाई व्यवस्थित गर्न सरकारले छुट्टै कार्यविधि समेत तयार पारेको जनाएको छ। सरकारको विश्वास छ कि यस योजनाले उपभोक्तामा सक्कली बिल लिने बानीको विकास हुनुका साथै कर छली नियन्त्रण, राजस्व वृद्धि र पारदर्शी व्यापार प्रणाली प्रवर्द्धनमा सहयोग पुग्नेछ।
