विश्वकप फुटबलः दुई गोलले पछि परेको बेल्जियमको अविस्मरणीय पुनरागमन, सेनेगललाई हराउँदै अन्तिम १६ मा
काठमाडौं, १८ असार – दुई गोलले पछि परेको अवस्थाबाट शानदार पुनरागमन गर्दै बेल्जियमले सेनेगललाई ३–२ ले पराजित गरेको छ। फिफा विश्वकप–२०२६ अन्तर्गत अमेरिकाको सिएटल स्टेडियममा सम्पन्न अन्तिम–३२ को खेलमा अतिरिक्त समयको अन्तिम मिनेटमा कप्तान युरी थिलेमन्सले पेनाल्टीमा निर्णायक गोल गर्दै बेल्जियमलाई अन्तिम १६ मा पुर्याएका हुन्।
खेलको २४औँ मिनेटमा हबीब डायराले गोल गर्दै सेनेगललाई अग्रता दिलाएका थिए। दोस्रो हाफको ५१औँ मिनेटमा इस्माइला सारले अर्को गोल थपेपछि सेनेगल २–० ले अघि बढेको थियो। तर निर्धारित समयको अन्तिम पाँच मिनेट बेल्जियमका लागि निर्णायक बन्यो। ८६औँ मिनेटमा रोमेलु लुकाकुले गोल गर्दै टोलीलाई खेलमा फर्काए भने ८९औँ मिनेटमा कप्तान थिलेमन्सले बराबरी गोल गर्दै खेल २–२ को अवस्थामा पुर्याए।
निर्धारित समय बराबरीमा सकिएपछि खेल अतिरिक्त समयमा प्रवेश गरेको थियो। खेल पेनाल्टी सुटआउटतर्फ उन्मुख भइरहेका बेला अतिरिक्त समयको अन्तिम मिनेटमा सेनेगलका लामिन कामाराले पेनाल्टी क्षेत्रभित्र फाउल गरेपछि भिडियो सहायक रेफ्री (भिएआर) को समीक्षा पश्चात् बेल्जियमले पेनाल्टीको अवसर पायो। उक्त अवसरलाई थिलेमन्सले सदुपयोग गर्दै टोलीलाई ३–२ को नाटकीय जित दिलाए।
यो जितसँगै बेल्जियमले विश्वकप इतिहासकै उल्लेखनीय पुनरागमनमध्ये एक जित दर्ता गरेको छ। साथै, खेलको १२५औँ मिनेटमा थिलेमन्सले गरेको गोल यस विश्वकपको सबैभन्दा ढिलो गोलका रूपमा पनि दर्ज भएको छ। पराजयसँगै अन्तिम १६ पुग्ने सेनेगलको सपना अन्तिम क्षणमा चकनाचुर भएको छ।
यस विश्वकपमा सहभागी १० अफ्रिकी टोलीमध्ये नौ टोली नकआउट चरणमा पुगेका थिए। तर हालसम्म सम्पन्न अन्तिम–३२ का खेलमा मोरक्कोबाहेक अन्य अफ्रिकी टोलीले हार व्यहोरेका छन्। यसअघि दक्षिण अफ्रिका, आइभरी कोस्ट र डीआर कंगो पनि प्रतियोगिताबाट बाहिरिसकेका छन् भने केप भर्डे, इजिप्ट, घाना र अल्जेरियाले आफ्नो अन्तिम–३२ को खेल खेल्न बाँकी छ। अब बेल्जियमले क्वार्टरफाइनल प्रवेशका लागि अमेरिका र बोस्निया तथा हर्जगोभिनाबीचको विजेतासँग प्रतिस्पर्धा गर्नेछ।
