ब्राजिलको राष्ट्रपतिमा लुला चौथो कार्यकालका लागि निर्वाचित
काठमाडौँ । ब्राजिलका वामपन्थी नेता लुइज इनासियो लुला डा सिल्भा चौथो कार्यकालका लागि राष्ट्रपतिमा निर्वाचित भएका छन्। आइतबार सम्पन्न दोस्रो चरणको प्रतिस्पर्धात्मक निर्वाचनमा उनले दक्षिणपन्थी उम्मेदवार तथा पूर्वराष्ट्रपति जाइर बोल्सोनारोका छोरा फ्लाभियो बोल्सोनारोलाई पराजित गरेका हुन्।
ब्राजिलको सर्वोच्च निर्वाचन अदालतले सार्वजनिक गरेको नतिजाअनुसार ९९ दशमलव ८ प्रतिशतभन्दा बढी मतगणना सम्पन्न हुँदा ८० वर्षीय लुलाले ५१ दशमलव ७६ प्रतिशत मत प्राप्त गरेका छन्। उनका प्रतिस्पर्धी फ्लाभियो बोल्सोनारोले ४८ दशमलव २४ प्रतिशत मत पाएका छन्।
यसअघि अक्टोबर ४ मा सम्पन्न पहिलो चरणको मतदानमा फ्लाभियो बोल्सोनारो अगाडि रहेका थिए। तर दोस्रो चरणमा लुलाले जित हासिल गरेका हुन्। ल्याटिन अमेरिकी क्षेत्रका अर्जेन्टिना, चिली र कोलम्बियालगायतका देशमा दक्षिणपन्थी नेताहरूको प्रभाव बढिरहेका बेला ब्राजिलमा लुलाको जितलाई राजनीतिक रूपमा महत्त्वपूर्ण मानिएको छ।
लुलाले यसअघि सन् २००३ देखि २०१० सम्म र सन् २०२३ देखि ब्राजिलको नेतृत्व सम्हाल्दै आएका छन्। चौथो कार्यकालका लागि निर्वाचित भएसँगै उनले संसदमा बलियो उपस्थिति रहेको दक्षिणपन्थी गठबन्धन र विभाजित जनमतका बीच सरकार सञ्चालन गर्नुपर्ने चुनौती सामना गर्नुपर्नेछ।
