सुकुमवासी बस्ती खाली गराउने निर्देशनप्रति जेनजी अगुवाको आपत्ति
काठमाडौँ, १० वैशाख – प्रधानमन्त्री बालेन्द्र शाह ले अतिक्रमित सुकुमवासी बस्ती खाली गराउन सुरक्षा निकायका प्रमुखलाई दिएको निर्देशनप्रति जेनजी अगुवा रक्षा बम ले कडा विरोध जनाएकी छन्। सामाजिक सञ्जालमार्फत प्रतिक्रिया दिँदै उनले उक्त निर्णयलाई प्रधानमन्त्रीको ‘अपरिपक्वता’ मात्र नभई राष्ट्रिय स्वतन्त्र पार्टी को ‘राजनीतिक बेइमानी’ भएको टिप्पणी गरेकी छन्। उनले पार्टीको वाचापत्र अध्ययन गर्न समेत सुझाव दिएकी छन्।
प्रधानमन्त्री शाहले बुधबार सुरक्षा निकायका प्रमुखहरूसँगको बैठकमा काठमाडौँ उपत्यकाबाट सुकुमवासी बस्ती हटाउने प्रक्रिया सुरु गर्न निर्देशन दिएका थिए। यसअघि पार्टी सभापति रवि लामिछाने ले सुकुमवासी बस्ती हटाउने प्रयासको विरोध गर्दै ‘डोजर चलाउने भए आफ्नै छातीमाथि चलाउन’ चुनौती दिएको भिडियो सामाजिक सञ्जालमा चर्चित बनेको थियो।
प्रधानमन्त्री शाहले २१ फागुनमा सार्वजनिक गरेको चुनावी वाचापत्रमा झापाको सुकुमवासी समस्या एक हजार दिनभित्र समाधान गर्ने प्रतिबद्धता व्यक्त गरेका थिए। यसअघि काठमाडौँ महानगरपालिकाको प्रमुख रहँदा पनि शाहले सुकुमवासी बस्ती हटाउने प्रयास गरेका थिए। तर स्थानीयको प्रतिरोधका कारण सो प्रयास सफल हुन सकेको थिएन। अहिले प्रधानमन्त्री बनेपछि उनले पुनः उक्त अभियान अघि बढाउन खोजेका हुन्।
