अमेरिकी मध्यावधि निर्वाचनमा आज मतदान, सिनेटको नियन्त्रण कसले पाउने भन्ने चासो
वाशिङ्टन । अमेरिकी कंग्रेसको माथिल्लो सदन सिनेटमा कसको नियन्त्रण रहने भन्ने टुंगो लगाउन आज देशभर मध्यावधि निर्वाचनअन्तर्गत मतदान भइरहेको छ। सन् २०२६ को यस निर्वाचनमा ५ करोड ६० लाखभन्दा बढी मतदाताले यसअघि नै अग्रिम मतदान गरिसकेका छन्। बाँकी मतदाताले आज विभिन्न राज्यका मतदान केन्द्रमा पुगेर मतदान गर्दैछन्।
नयाँ सर्वेक्षणहरूले डेमोक्र्याटिक पार्टी सिनेटमा बहुमतको नजिक पुगेको देखाएका छन्। यसैबीच, राष्ट्रपति डोनाल्ड ट्रम्पले विपक्षी दलले कंग्रेसमा बहुमत हासिल गरे आफूले उनीहरूका हरेक विधेयकमा भिटो प्रयोग गर्ने चेतावनी दिनुभएको छ।
निर्वाचनमा सबैभन्दा बढी चासोको केन्द्र बनेको मिशिगन राज्यमा रिपब्लिकन उम्मेदवार माइक रोजर्स र डेमोक्र्याट उम्मेदवार अब्दुल एल–सईदबीच कडा प्रतिस्पर्धा भइरहेको छ। मतदानको अन्तिम समयमा डेमोक्र्याटिक सांसद हेली स्टिभेन्सले आफ्नै पार्टीका उम्मेदवारलाई छाडेर रिपब्लिकन उम्मेदवार रोजर्सलाई समर्थन गरेपछि त्यहाँको चुनावी माहोल थप तातेको छ। यसले मतदाताको निर्णयमा कस्तो प्रभाव पार्छ भन्ने विषयलाई विश्लेषकहरूले चासोका साथ हेरिरहेका छन्।
यसैबीच, मतदान सुरु हुनुभन्दा केही घण्टाअघि राष्ट्रपति ट्रम्प प्रशासनलाई अमेरिकी सर्वोच्च अदालतबाट झट्का लागेको छ। गैरनागरिकले मतदान गरेको हुन सक्ने दाबी गर्दै क्यालिफोर्नियाका हजारौँ मतपत्र गणनाबाट अलग राख्न न्याय मन्त्रालयले गरेको आग्रह अदालतले अस्वीकार गरेको छ। यससँगै ती मतपत्र नियमित रूपमा गणना हुने बाटो खुलेको छ।
मिशिगनबाहेक साउथ क्यारोलिना, क्यान्सस, इन्डियाना र अलास्काको चुनावी प्रतिस्पर्धालाई पनि निर्णायक मानिएको छ। साउथ क्यारोलिनामा डा. एनी एन्ड्रयुजले रिपब्लिकन सिनेटर डार्लिन ग्राहमलाई चुनौती दिनुभएको छ। क्यान्ससमा एडम ह्यामिल्टन र इन्डियानामा बो बायेले महँगी तथा आर्थिक मुद्दालाई प्रमुखताका साथ उठाएका छन्।
त्यस्तै, अलास्कामा सिनेटर ड्यान सुलिभान र मेरी पेल्टोलाबीच कडा प्रतिस्पर्धा भइरहेको छ। महँगी, अर्थतन्त्र र राजनीतिक ध्रुवीकरण प्रमुख चुनावी मुद्दा बनेका बेला आजको मतदानले आगामी दुई वर्षका लागि अमेरिकी कंग्रेसको शक्ति सन्तुलन निर्धारण गर्नेछ। यसले राष्ट्रपति ट्रम्पको बाँकी कार्यकालमा सरकारका नीति तथा निर्णय कार्यान्वयन गर्ने क्षमतामा समेत प्रभाव पार्ने देखिएको छ।
