ट्रम्पले स्ट्रेट अफ होर्मुजमा २० प्रतिशत कार्गो शुल्क लगाउने प्रस्ताव फिर्ता लिए
वासिङ्टन डीसी, ३१ असार – अमेरिकी राष्ट्रपति डोनाल्ड ट्रम्पले स्ट्रेट अफ होर्मुज समुद्री मार्ग हुँदै आवतजावत गर्ने जहाजहरूमा २० प्रतिशत कार्गो शुल्क लगाउने आफ्नो प्रस्ताव फिर्ता लिएका छन्। यसको सट्टा खाडी मुलुकहरूसँग व्यापक व्यापार तथा लगानी सम्झौतामार्फत अमेरिकाले दीर्घकालीन आर्थिक लाभ लिने रणनीति अपनाइने उनले बताएका छन्।
सामाजिक सञ्जाल ट्रुथ सोसलमार्फत ट्रम्पले मध्यपूर्वका नेताहरूसँग भएको ‘अत्यन्त सकारात्मक’ वार्तापछि शुल्क लगाउने निर्णय पुनर्विचार गरिएको जानकारी दिएका हुन्। अब प्राथमिकता व्यापार विस्तार र खाडी क्षेत्रबाट अमेरिकामा ठूलो लगानी भित्र्याउनेतर्फ केन्द्रित हुने उनले उल्लेख गरेका छन्। ट्रम्पका अनुसार प्रस्तावित लगानीबाट अमेरिकामा नयाँ उद्योग तथा उत्पादन केन्द्र स्थापना हुनेछन्, जसले लाखौँ नयाँ रोजगारी सिर्जना गर्नुका साथै उच्च तलब भएका रोजगारीका अवसर पनि बढाउनेछ।
यसअघि सोमबार ट्रम्पले अमेरिका स्ट्रेट अफ होर्मुजको ‘संरक्षक’को भूमिकामा रहेको दाबी गर्दै उक्त समुद्री मार्ग प्रयोग गर्ने सबै कार्गोमा २० प्रतिशत शुल्क लगाउने घोषणा गरेका थिए। समुद्री मार्गको सुरक्षामा अमेरिकाले ठूलो खर्च बेहोरेकाले त्यसको भार अन्य मुलुकहरूले पनि वहन गर्नुपर्ने उनको तर्क थियो।
यद्यपि उनले इरानसँग सम्बन्धित जहाज तथा कार्गोमाथिको कडा नीति भने यथावत् रहने स्पष्ट पारेका छन्। ट्रम्पले इरानी जहाज र इरानी बन्दरगाहबाट आउने–जाने कार्गोमाथि पूर्ण प्रतिबन्ध कायम रहने दोहोर्याउँदै स्ट्रेट अफ होर्मुज सबै अन्य मुलुकका लागि भने खुला रहने बताएका छन्।
साथै, अमेरिकी सेनाकै कारण स्ट्रेट अफ होर्मुज सुरक्षित रहेको र विश्वव्यापी तेल आपूर्ति सहज रूपमा सञ्चालन भइरहेको दाबी गर्दै उनले रक्षा मन्त्री पीट हेगसेथ, संयुक्त चिफ्स अफ स्टाफका अध्यक्ष ड्यान केन, सेन्ट्रल कमान्डका प्रमुख एडमिरल ब्राड कुपर तथा अमेरिकी सशस्त्र बलको प्रशंसा गरेका छन्।
