विदेशी मुद्राको भाउ बढ्यो, अमेरिकी डलर १५३ रुपैयाँ नाघ्यो
काठमाडौं, २६ जेठ । नेपाल राष्ट्र बैंक ले सोमबारका लागि निर्धारण गरेको विदेशी मुद्राको विनिमयदर अनुसार अधिकांश प्रमुख विदेशी मुद्राको मूल्य वृद्धि भएको छ। आज अमेरिकी डलर एकको खरिददर १५२ रुपैयाँ ८४ पैसा र बिक्रीदर १५३ रुपैयाँ ४४ पैसा कायम गरिएको छ। अघिल्लो दिन यसको खरिददर १५१ रुपैयाँ ६२ पैसा र बिक्रीदर १५२ रुपैयाँ २२ पैसा रहेको थियो।
युरो, बेलायती पाउण्ड, स्वीस फ्रयाङ्क, अष्ट्रेलियन डलर, क्यानेडियन डलर तथा सिङ्गापुर डलरको मूल्य पनि बढेको छ। युरो एकको खरिददर १७६ रुपैयाँ ३९ पैसा र बिक्रीदर १७७ रुपैयाँ ९ पैसा निर्धारण गरिएको छ भने पाउण्ड स्ट्रलिङको खरिददर २०४ रुपैयाँ २६ पैसा र बिक्रीदर २०५ रुपैयाँ ६ पैसा कायम भएको छ।
त्यस्तै स्वीस फ्रयाङ्कको खरिददर १९२ रुपैयाँ र बिक्रीदर १९२ रुपैयाँ ७५ पैसा, अष्ट्रेलियन डलरको खरिददर १०८ रुपैयाँ १२ पैसा र बिक्रीदर १०८ रुपैयाँ ५४ पैसा तथा क्यानेडियन डलरको खरिददर १०९ रुपैयाँ ७० पैसा र बिक्रीदर ११० रुपैयाँ १३ पैसा तोकिएको छ। एसियाली मुद्रातर्फ जापानी येन, चिनियाँ युआन, थाई भाट, मलेसियन रिङ्गेट, युएई दिराम, साउदी रियाल तथा दक्षिण कोरियाली वनको मूल्यमा पनि वृद्धि भएको छ।
कुवेती दिनार, बहराइन दिनार र ओमानी रियालजस्ता खाडी मुलुकका मुद्राको भाउ पनि बढेको राष्ट्र बैंकले जनाएको छ। भारतीय रुपैयाँ भने स्थिर रहेको छ। भारतीय १०० रुपैयाँको खरिददर १६० रुपैयाँ र बिक्रीदर १६० रुपैयाँ १५ पैसा कायम गरिएको छ। राष्ट्र बैंकले विनिमयदर आवश्यकताअनुसार जुनसुकै समयमा संशोधन गर्न सकिने जनाएको छ। साथै, वाणिज्य बैंकहरूले निर्धारण गर्ने विनिमयदर केही फरक हुन सक्ने उल्लेख गर्दै अद्यावधिक दर आफ्नो आधिकारिक वेबसाइटमा उपलब्ध हुने जानकारी दिएको छ।
