स्वरोजगारका लागि सीपमूलक तालिम सञ्चालन
कञ्चनपुर, २ चैत – शुक्लाफाँटा नगरपालिका ले स्थानीयलाई स्वरोजगारमार्फत आत्मनिर्भर बनाउने उद्देश्यले १३३ जनालाई सीपमूलक तालिम प्रदान गरेको छ। आर्थिक रूपमा विपन्न, दलित, जनजाति, महिला, अपाङ्गता भएका व्यक्ति, सहिद परिवार, द्वन्द्वपीडित तथा विदेशबाट फर्केका व्यक्तिलाई लक्षित गर्दै नगरपालिकाले चालु आर्थिक वर्षमा लघु तथा घरेलु उद्योग प्रवर्द्धन कार्यक्रमअन्तर्गत उक्त तालिम सञ्चालन गरेको हो।
कार्यक्रमअन्तर्गत काष्ठकला सम्बन्धी २०, ग्यास चुलो मर्मत सम्बन्धी २०, गुन्द्री बनाउने २०, खेलौना बनाउने १३, अटो ड्राइभिङ २०, दुना–टपरी बनाउने २० तथा फुट मसाज (सुत्केरी स्याहार) सम्बन्धी २० जनाले तालिम लिएका छन्। तालिम लिएका व्यक्तिलाई व्यवसाय सञ्चालनमा सहयोग पुगोस् भन्ने उद्देश्यले आवश्यक सामग्रीसमेत अनुदानमा उपलब्ध गराइएको कार्यक्रमका उद्यम विकास सहजकर्ता धनबहादुर चौधरी ले बताउनुभयो।
“तालिमसँगै आवश्यक सामग्री उपलब्ध गराएर लक्षित समूहका व्यक्तिलाई आत्मनिर्भर बनाउने प्रयास गरेका छौँ,” उहाँले भन्नुभयो, “तालिम लिएकामध्ये धेरैजना स्वरोजगारमा संलग्न भई व्यवसायिक गतिविधि सञ्चालन गरिरहेका छन्।”तालिम लिएकामध्ये ३९ जनाले आफ्नै व्यवसाय सञ्चालन गर्न थालेका छन्।
दुना–टपरी बनाउने तालिम लिनुभएकी सरिता चौधरी ले तालिमपछि दुना–टपरी उत्पादन गरी बजारमा बिक्री गरेर आम्दानी गर्न थालेको बताउनुभयो। त्यस्तै, आधुनिक सिलाइ मेसिन अनुदानमा प्राप्त गर्नुभएका जगतबहादुर सिंह ले गार्मेन्ट व्यवसाय विस्तार गर्न तालिमले सहयोग पुगेको जानकारी दिनुभयो।
तालिम लिनेको उमेर समूह १८ देखि ५५ वर्षसम्म रहेको छ, जसमा अधिकांश महिला सहभागी छन्। नगरपालिकाका प्रवक्ता लालबहादुर ऐर ले ‘हात–हातमा सीप र घर–घरमा रोजगारी’ पु¥याउने उद्देश्यले तालिम सञ्चालन गरिएको जानकारी दिनुभयो।
