पूर्वमन्त्री राजकुमार गुप्ता पोखरा लिचीबारी घुस मुद्दामा थुनामा
काठमाडौँ, १७ पुस – विशेष अदालतले पोखरा लिचीबारी घुस मामिलामा पूर्वमन्त्री राजकुमार गुप्तालाई थुनामा पठाउने आदेश दिएको छ। अध्यक्ष सुदर्शनदेव भट्ट, डिल्लीरत्न श्रेष्ठ र विदुर कोइरालाको इजलासले गुप्ताको बयान झुटो ठहर गर्दै अदालतमा पेश भएका प्रमाणका आधारमा उनलाई तत्काल थुनामा राख्नुपर्ने निर्णय गरेको हो।
गत बिहीबार अदालतमा उपस्थित गुप्ताले बयान दिएका थिए कि उनी ‘पूर्वमन्त्री रञ्जिता श्रेष्ठ बाहेक अरुलाई चिन्दिनँ’ र आफूले घुस नलिएको दाबी गर्दै अडियो रेकर्डमा प्रविधिको दुरुपयोग भएको बताएका थिए। तर, अदालतले गुप्ताविरुद्धका अन्य प्रमाणहरू विश्वसनीय ठहर गर्दै उनलाई थुनामा पठाउने आदेश दिएको हो।
मुद्दामा उनीमाथि मालपोत कार्यालय कास्कीका प्रमुख रामचन्द्र अधिकारीलाई थमौती गराइदिने तथा सेवा दिनेसँगै ५३ लाख रुपैयाँ घुस लिएको आरोप छ। त्यस्तै, भूमि आयोग कास्कीको अध्यक्ष खम बहादुर पुनको नियुक्तिका लागि थप २५ लाख रुपैयाँ लेनदेनमा संलग्न भएको आरोपसमेत रहेको छ। अदालतले कुल ७८ लाख रुपैयाँ विगो माग गरिएको जानकारी पनि प्रस्तुत गरेको छ।
अदालतले गुप्तासँग बारम्बार फोन संवाद भएको प्रमाण, अडियो फरेन्सिक प्रतिवेदन र जग्गा मिलाउने क्रममा बरपिपल रिसोर्टमा भएको बैठक तथा लेनदेनको फोटो प्रमाणको आधारमा उनलाई विशेष अदालत ऐन, २०५९ को दफा ७ (ङ) अनुसार तत्काल थुनामा राखेर पुर्पक्ष गर्न आदेश दिएको छ। पूर्वमन्त्रीविरुद्ध अदालतले थुनामा पठाउने यो घटना दुर्लभ मानिएको छ।
