मधेश प्रदेशमा नयाँ सरकार गठनको दाबी पेश गर्ने आज अन्तिम दिन
जनकपुरधाम, १९ मंसिर – मधेश प्रदेशमा नयाँ सरकार गठनका लागि एमाले बाहेकको सात दलीय गठबन्धनले आज दाबी पेश गर्दैछ। शुक्रबार साँझ ५ बजेसम्म दाबी पेश गर्ने समय तोकिएको छ। सात दलीय गठबन्धनका नेताहरूले आज बिहानदेखि आन्तरिक छलफलमा व्यस्त रहेका छन्। गठबन्धनमा नेपाली कांग्रेस, जसपा नेपाल, जनमत पार्टी, माओवादी केन्द्र, लोसपा, एकीकृत समाजवादी र नागरिक उन्मुक्ति पार्टी समावेश छन्।
संसदीय दलको ठूलो दलको हैसियतमा एमालेले प्रतिनिधित्व गरेको अवस्थामा नेतृत्त्व गर्ने सरोजकुमार यादवको सरकारले गत मंसिर १७ गते राजीनामा दिएको थियो। सर्वोच्च अदालतको आदेश अनुसार प्रदेश प्रमुख सुरेन्द्र लाभ कर्णले संविधानको धारा १६८ को उपधारा २ बमोजिम बहुमत प्राप्त गर्ने सदस्यलाई दाबी पेश गर्न आह्वान गरेका थिए।
सात दलीय गठबन्धनका नेताहरूले बिहीबार आठ घण्टा लामो छलफल गरी सरकार गठनको रणनीति बनाएका थिए। जसपा संसदीय दलका नेता सरोजकुमार यादवले गठबन्धनको सहमतिअनुसार नयाँ मुख्यमन्त्रीको टुंगो लागेको र आज दिउँसो २ बजे प्रदेश प्रमुख कार्यालयमा दाबी पेश गरिने बताएका छन्।
उक्त बैठकमा सहभागी अर्का सांसदका अनुसार दाबी पेश अघि पुन: बैठक बस्ने र अन्तिम नाम टुंगो लगाइने सहमति भएको छ। नयाँ मुख्यमन्त्रीको शपथसँगै सबै दलका मन्त्रीहरू पनि एकैपटक शपथ ग्रहण गर्ने तयारी छ।
