म्यारिज ब्यूरो सञ्चालन गरेको आरोपमा चार चिनियाँ नागरिक पक्राउ
काठमाडौँ, २९ कात्तिक – काठमाडौँको सोह्रखुट्टेमा अवैध रूपमा म्यारिज ब्यूरो सञ्चालन गरेको आरोपमा चार जना चिनियाँ नागरिक पक्राउ परेका छन्। व्यवसायसम्बन्धी भिसामा नेपाल आएको उनीहरू विवाह मेलमिलाप गर्ने गतिविधिमा संलग्न रहेको विशेष सूचनाका आधारमा अध्यागमन विभागको टोलीले छापा मारी पक्राउ गरेको हो।
अध्यागमन विभागका महानिर्देशक रामचन्द्र तिवारीका अनुसार पक्राउ परेकालाई शुक्रबार साँझ हिरासतमा राखी अनुसन्धान भइरहेको छ। प्रारम्भिक सूचनाअनुसार, ती व्यक्तिहरूले गरिब तथा विकट क्षेत्रका युवतीलाई चिनियाँ नागरिकसँग विवाह गराउने काम गर्दै आएको आशंका छ।
अनुसन्धानका क्रममा केही महिलालाई उनीहरूले चीनसम्म पठाइसकेको जानकारीसमेत खुलेको विभागले जनाएको छ। पक्राउ परेकामा एक महिला र तीन पुरुष छन्। तीमध्ये केहीले विभिन्न प्रकारका भिसा लिई लामो समयदेखि नेपालमा आवतजावत गर्दै आएको तथ्य पनि भेटिएको छ।
