कोशी, तराई र वाग्मतीका पहाडी भागमा भारी वर्षा हुने पूर्वानुमान
काठमाडौँ, १८ भदौ – जल तथा मौसम पूर्वानुमान महाशाखाले आज देशका विभिन्न भागमा वर्षाको सम्भावना रहेको जनाएको छ। महाशाखाका अनुसार मनसुनको न्यून चापीय रेखा सरदर स्थानभन्दा दक्षिणतिर रहेकाले दिउँसो देशभर साधारणतया बदली रहने अनुमान गरिएको छ। लुम्बिनी प्रदेशका साथै पहाडी भूभाग र तराईका केही स्थानमा मध्यम वर्षा पर्न सक्ने पूर्वानुमान गरिएको छ।
आज राति भने कोशी र मधेस प्रदेशलगायत पहाडी भागमा साधारणतया बदली रहने र बाँकी भागमा आंशिक बदली हुने महाशाखाले जनाएको छ। कोशी, मधेस, वाग्मती र गण्डकी प्रदेशका केही स्थानसहित अन्य प्रदेशका पहाडी भागका कतिपय स्थानमा मध्यम वर्षा हुने देखिएको छ। साथै, कोशी, तराई र वाग्मती प्रदेशका पहाडी क्षेत्रमा एक–दुई स्थानमा भारी वर्षा हुने सम्भावना रहेको छ।
महाशाखाले लगातारको वर्षाले पहिरो र गेग्रान बहाव (डेब्रिज फ्लो) को जोखिम बढ्न सक्ने, साना–ठूला नदीनालामा पानीको सतह उक्लिन सक्ने र यातायात क्षेत्र प्रभावित हुन सक्ने चेतावनी दिँदै सर्वसाधारणलाई सतर्क रहन र आवश्यक पूर्वतयारी गर्न आग्रह गरेको छ।
