नेप्से परिसूचकमा ७५ अंकको उछाल, १६ अर्बभन्दा बढीको कारोबार

काठमाडौँ, १ साउन – आर्थिक वर्ष २०८२/८३ को पहिलो दिन नेपाल स्टक एक्सचेञ्ज (नेप्से) परिसूचकमा उल्लेखनीय वृद्धि भएको छ। नेप्से परिसूचक आज ७५.८४ अङ्कले उकालो लाग्दै २,८७०.६३ विन्दुमा पुगेको छ। यो वृद्धिदर २.७१ प्रतिशत हो।

आज कूल ३११ कम्पनीका ३ करोड ८६ लाख ३४ हजार ३५० कित्ता शेयर १ लाख ४१ हजार ४३४ पटक कारोबार हुँदा कुल कारोबार रकम १६ अर्ब ५९ करोड २१ लाख ५ हजार ४५५.१७ रुपैयाँ पुगेको छ। कारोबार रकम अघिल्ला दिनहरूको तुलनामा उल्लेख्य रूपमा बढेको छ।

आज २४० कम्पनीको शेयर मूल्य बढ्दा मात्र ९ कम्पनीको घटेको छ। सामूहिक रूपमा हेर्दा, कारोबार भएका सबै समूहगत परिसूचकहरूमा वृद्धि देखिएको छ।

सबैभन्दा धेरै वृद्धिदर देखाउने समूह ‘अन्य’ समूह हो, जसको परिसूचक ५.०९ प्रतिशतले बढ्यो। त्यस्तै, लगानी समूह ३.१७ प्रतिशत, जीवन बीमा ३.१४ प्रतिशत, हाइड्रोपावर ३.०४ प्रतिशतले उकालो लागेका छन्।

अन्य उल्लेखनीय वृद्धि हुने समूहहरूमा:

• फाइनान्स: २.८०%

• उत्पादन तथा प्रशोधन: २.९४%

• होटल तथा पर्यटन: २.६०%

• माइक्रोफाइनान्स: २.५०%

• निर्जीवन बीमा: २.१८%

• विकास बैंक: १.९५%

• बैंकिङ: १.७६%

• व्यापार: १.७६%

आजको कारोबारमा ट्रेड टावर लिमिटेड को शेयर मूल्यमा पोजिटिभ सर्किट लागेको छ, जुन बजारको उच्च उत्साह जनाउने संकेत हो।
विपरीत, एनआबिएल स्टेबल फण्ड को शेयर मूल्य ७.५८ प्रतिशतले घटेर सबैभन्दा बढी ह्रास हुने शेयर बन्यो।

साथै, बजार विश्लेषकहरूका अनुसार आर्थिक वर्षको सुरुवातमै देखिएको यस्तो तीव्र कारोबारी चापले बजारप्रति लगानीकर्ताको भरोसा अझ बलियो भएको देखाउँछ।