म्याग्दीमा ९ सयभन्दा बढी घरमा ‘एक घर, एक धारा’
म्याग्दी, ३२ असार — म्याग्दी जिल्लामा ९ सय ३१ घरमा ‘एक घर, एक धारा’ योजना अन्तर्गत स्वच्छ खानेपानी सुविधा विस्तार गरिएको छ। खानेपानी, जलस्रोत तथा सिँचाइ डिभिजन कार्यालय म्याग्दीले चालु आर्थिक वर्ष २०८१/८२ मा सञ्चालन गरेका योजनाबाट सो उपलब्धि हासिल भएको हो।
डिभिजन प्रमुख झलकमोहन ओझाका अनुसार १,२८३ वटा धारा निर्माण गरिएका छन्, जसमध्ये ९३१ धारामा मिटर जडान गरिएको छ। योजना कार्यान्वयनमार्फत ३,११९ मिटर मुख्य पाइपलाइन, १०६ किलोमिटर शाखा पाइप, २२ वटा रिजर्भ ट्याङ्की (४,०७२ घनमिटर क्षमता) र २७७ वटा अन्य संरचना निर्माण गरिएको हो।
बजेट र योजनाको प्रगति
-
प्रदेश सरकारका ३६ योजनामा रु ६ करोड ९८ लाख २५ हजार विनियोजन भएकोमा ३५ योजना कार्यान्वयन भई ९६.०९ प्रतिशत अर्थात् रु ६ करोड ७० लाख ९५ हजार खर्च भएको छ।
-
संघीय सरकारका पाँच योजनामध्ये तीन योजना कार्यान्वयनमा गएकामा रु ५१ लाखको बजेटमध्ये ८६.१९ प्रतिशत अर्थात् रु ४३ लाख ९५ हजार खर्च गरिएको छ।
खानेपानी पुगेका प्रमुख स्थानहरू
चालु वर्षमा दोवा, हिस्तान औला, पुलाचौर र बरंजाको दह–खर्क क्षेत्रमा घर–घरमा मिटरसहितको धारा जडान गरिएको छ। औला स्किम अन्तर्गत घराम्दी खानेपानी योजनाका उपभोक्ता समितिका अध्यक्ष डिलप्रसाद फगामीका अनुसार सबै घरमा मिटरसहित खानेपानी धारा जडान भई नियमित वितरण सुरु भएको छ।
