पहाडमा वर्षा, तराईमा गर्मी बढ्दै
काठमाडौं, ४ वैशाख – मौसम पूर्वानुमान महाशाखा का अनुसार हाल देशमा पश्चिमी तथा स्थानीय वायुको आंशिक प्रभावका कारण मिश्रित मौसम देखिएको छ। हाल कोशी प्रदेश, बागमती प्रदेश र गण्डकी प्रदेश का पहाडी तथा हिमाली क्षेत्रमा साधारणतया बदली रहेको छ। गण्डकीका केही पहाडी भू–भागमा मेघगर्जन र चट्याङसहित हल्का वर्षा भइरहेको छ भने अन्य पहाडी क्षेत्रमा आंशिक बदली देखिएको छ।
तराईका अधिकांश जिल्लामा भने मौसम सामान्यतया सफा रहँदा गर्मी बढ्न थालेको छ। महाशाखाले शुक्रबारका लागि जारी गरेको पूर्वानुमानअनुसार कोशी, बागमती र गण्डकी प्रदेशका पहाडी तथा हिमाली क्षेत्रमा हल्का वर्षा र हिमपातको सम्भावना रहेको छ। साथै यी क्षेत्रका केही स्थानमा चट्याङसहित वर्षा हुन सक्ने जनाइएको छ।
यस्तै कर्णाली प्रदेश र सुदूरपश्चिम प्रदेश का उच्च हिमाली भू–भागका एक–दुई स्थानमा हल्का हिमपातको सम्भावना रहेको छ। पहाडी क्षेत्रमा वर्षाको सम्भावना रहे पनि मधेस प्रदेश, लुम्बिनी प्रदेश र सुदूरपश्चिमका तराई क्षेत्रमा तापक्रम बढ्दै जाने संकेत गरिएको छ। अत्यधिक गर्मीका कारण जनजीवन प्रभावित हुन सक्ने भएकाले सतर्कता अपनाउन महाशाखाले आग्रह गरेको छ।
