एनपिएलः आज दुई खेल हुँदै

काठमाडौँ, १८ मङ्सिर – त्रिभुवन विश्वविद्यालय अन्तरराष्ट्रिय क्रिकेट रङ्गशालामा जारी दोस्रो संस्करणको नेपाल प्रिमियर लिग (एनपिएल) अन्तर्गत आज दुई खेल हुने भएका छन्। पहिलो खेल बिहान ११ः४५ बजे पोखरा एभेन्जर्स र काठमाडौँ गोर्खाजबीच हुनेछ। पाँच खेलबाट चार अङ्क मात्र जोडेको पोखरालाई प्लेअफको सम्भावना जोगाइराख्न जित अनिवार्य छ। काठमाडौँले भने छ खेलमा आठ अङ्क जोडिसकेको छ।

दोस्रो खेल अपराह्न ४ः०० बजे सुदूरपश्चिम रोयल्स र चितवन राइनोजबीच हुने छ। प्लेअफमा स्थान सुरक्षित गरिसकेको सुदूरपश्चिम १० अङ्कसहित शीर्ष स्थानमा छ। पाँच खेलबाट चार अङ्क जोडेको चितवनलाई भने प्लेअफ सम्भावना कायम राख्न आजको खेल जित्नैपर्ने अवस्था छ।