भेनेजुएला भूकम्पः कम्तीमा १६४ जनाको मृत्यु, व्यापक क्षति

काराकास, १२ असार – भेनेजुएलामा बुधबार साँझ गएको दुई शक्तिशाली भूकम्पमा परी कम्तीमा १६४ जनाको मृत्यु भएको छ भने ९७० भन्दा बढी घाइते भएका छन्। सरकारले बिहीबारसम्म मृतक र घाइतेको उक्त विवरण पुष्टि गरेको छ। उद्धार तथा खोजी कार्य जारी रहेकाले मृतकको संख्या अझै बढ्न सक्ने अनुमान गरिएको छ।

भूगर्भविद्हरूका अनुसार बुधबार साँझ राजधानी काराकासको पश्चिमी क्षेत्रमा केही सेकेन्डको अन्तरमा ७.२ र ७.५ म्याग्निच्युडका दुई भूकम्प गएका थिए। सन् १९०० यताकै यो भेनेजुएलाको सबैभन्दा शक्तिशाली भूकम्प मानिएको छ। भूकम्पका कारण राजधानी काराकास तथा आसपासका क्षेत्रमा दर्जनौँ भवन पूर्ण रूपमा भत्किएका छन् भने सयौँ भवनमा चिरा परेको र अन्य संरचनामा व्यापक क्षति पुगेको छ। उद्धारकर्मी र स्थानीयवासी भग्नावशेषमा पुरिएकाहरूको खोजी तथा उद्धारमा जुटिरहेका छन्।

अन्तरिम राष्ट्रपति डेल्सी रोड्रिगेजका अनुसार राजधानीको उत्तरमा रहेको ला गुएरा राज्य सबैभन्दा बढी प्रभावित भएको छ। तटीय क्षेत्रमा विद्युत् सेवा अवरुद्ध भएको छ भने हजारौँ स्थानीयवासी रातभर सडक र खुला स्थानमा बस्न बाध्य भएका छन्। भूकम्पपछि लगातार परकम्प गइरहेकाले उद्धार कार्य थप चुनौतीपूर्ण बनेको छ। उपकरण र दक्ष जनशक्तिको अभावका कारण धेरै स्थानमा स्थानीयवासी आफैं उद्धारमा खटिएका छन्।

फ्रान्स, स्पेन, अमेरिका, चीन, भारत र ब्राजिललगायतका देशहरूले उद्धार टोली, चिकित्सा सामग्री तथा मानवीय सहायता उपलब्ध गराउने घोषणा गरेका छन्। फ्रान्सले ८५ जना उद्धारकर्मी र स्पेनले ५४ सदस्यीय सैनिक उद्धार टोली पठाउने जनाएको छ। अमेरिकी विदेशमन्त्री मार्को रुबियोले पनि खोज तथा उद्धार टोलीसहित मानवीय सहायता भेनेजुएला पठाउने तयारी पूरा भएको जानकारी दिएका छन्।

सुरक्षाको दृष्टिले सरकारले धेरै भवनमा ग्यास आपूर्ति बन्द गरेको छ भने नागरिकलाई आवश्यकबाहेक घरभित्र नबस्न आग्रह गरिएको छ। काराकास नजिकैको माइक्वेटिया अन्तर्राष्ट्रिय विमानस्थलमा पूर्वाधारमा गम्भीर क्षति पुगेपछि उडान सेवा पनि बन्द गरिएको छ। भूकम्पको धक्का कोलम्बियाको राजधानी बोगोटासम्म महसुस भएको थियो।

प्रभावित राज्यहरूमा ट्रुजिलो, काराबोबो, मिरान्डा र ला गुएरा रहेका छन्। भेनेजुएला भूकम्पीय जोखिमयुक्त देश मानिन्छ। यसअघि सन् १९९७ मा गएको शक्तिशाली भूकम्पमा ७३ जनाको मृत्यु भएको थियो भने सन् १९६७ मा काराकासमा गएको भूकम्पमा २३६ जनाले ज्यान गुमाएका थिए।