निर्वाचन २५ दिन बाँकीः मतदाताको गोपनीयता भङ्ग नगर्न जिल्ला निर्वाचन कार्यालयको आग्रह

काठमाडौँ, २५ माघ – निर्वाचन नजिकिँदै गर्दा सामाजिक सञ्जाल तथा केही अनलाइन सञ्चारमाध्यममार्फत मतदातासँग ‘कसलाई मतदान गर्नुहुन्छ’ भन्ने प्रश्न सोधेर मतदाताको गोपनीयता भङ्ग गरिएको भन्दै जिल्ला निर्वाचन कार्यालय काठमाडौँले आपत्ति जनाएको छ।

निर्वाचन कार्यालयले निर्वाचन आचारसंहिता पालना गर्न ध्यानाकर्षण गराउँदै मतदाताको गोपनीयता भङ्ग गर्ने कुनै पनि गतिविधि नगर्न तथा नगराउन आग्रह गरेको छ। निर्वाचन आचारसंहिता, २०८२ को दफा ४ बमोजिम त्यस्ता कार्यहरू आचारसंहिता उल्लङ्घन हुने उल्लेख गर्दै, उल्लङ्घन जारी रहे प्रचलित कानुनबमोजिम कारबाही प्रक्रिया अघि बढाइने चेतावनी दिइएको छ।

आचारसंहिताअनुसार उम्मेदवारको अन्तिम नामावली प्रकाशन भएपछि मतदान हुने दिनभन्दा १७ दिन अघिदेखि मात्र निर्वाचन प्रचारप्रसार गर्न पाइने व्यवस्था छ। उक्त अवधिमा जुलुस, आमसभा वा कोणसभा गर्न, सञ्चारमाध्यममार्फत प्रचारप्रसार सामग्री प्रकाशन वा प्रसारण गर्न तथा घरदैलो कार्यक्रम सञ्चालन गर्न सकिने प्रावधान छ।

यस्ता व्यवस्थाबारे पटक–पटक छलफल, अन्तर्क्रिया तथा सूचना प्रकाशनमार्फत जानकारी गराइसकिए पनि कतिपय राजनीतिक दल, तिनका प्रतिनिधि तथा उम्मेदवारले आचारसंहिता उल्लङ्घन गरिरहेको जिल्ला निर्वाचन कार्यालयले जनाएको छ।

निर्धारित समयअघि नै कोणसभा, प्रचारप्रसार, प्रचार सामग्री प्रकाशन तथा प्रसारण र घरदैलो कार्यक्रममार्फत मतदातालाई प्रभाव पार्ने गतिविधि भइरहेको जानकारी प्राप्त भएकाले त्यस्ता कार्य नगर्न÷नगराउन निर्वाचन कार्यालयले आग्रह गरेको छ। कुनै पनि व्यक्तिबाट आचारसंहिता उल्लङ्घन गरी प्रचारप्रसार गरिएको प्रमाण फेला परेमा तत्काल कानुनी कारबाही प्रक्रिया अघि बढाइने निर्वाचन कार्यालयले स्पष्ट पारेको छ।

आचारसंहिता अनुगमन अधिकृतहरू मुक्तिराम रिजाल, शिवराम भट्टराई, रोमाकान्त काफ्ले, मुनकुमार केसी, सुनिता सुवेदी र रुक्मागत अर्यालले संयुक्त रूपमा निर्वाचन आचारसंहिताका सम्पूर्ण पक्षको पालना गर्न सबै सरोकारवालालाई ध्यानाकर्षण गराउनुभएको छ।