चाडपर्वमा उपभोग्य वस्तु सहज र सुलभ आपूर्ति हुने

२३ भाद्र २०८२, सोमबार२३ भाद्र २०८२, सोमबार kankai

काठमाडौँ, २३ भदौ – सरकारले आगामी चाडपर्वलाई लक्षित गरी गुणस्तरीय उपभोग्य वस्तुको सहज र सुलभ आपूर्ति व्यवस्था गर्ने निर्णय गरेको छ । आइतबार सिंहदरबारमा मुख्यसचिव एकनारायण अर्यालको अध्यक्षतामा बसेको केन्द्रीय अनुगमन तथा मूल्याङ्कन समितिको ७१औँ बैठकले यो व्यवस्था गर्न विभिन्न निकायलाई निर्देशन दिएको हो ।

बैठकले सार्वजनिक यातायातलाई प्रभावकारी बनाउन, विपद् प्रभावित राजमार्गलाई छिट्टै सञ्चालनमा ल्याउन, मौसमी रोगहरू — डेंगु, हैजा, लम्पी स्किन आदि — को नियन्त्रणलाई प्रभावकारी बनाउन तथा बजारमा सहज आपूर्ति सुनिश्चित गर्न कदम चाल्ने निर्णय गरेको छ ।

बैठकका अनुसार—

उद्योग, वाणिज्य तथा आपूर्ति मन्त्रालय अन्तर्गत खाद्य व्यवस्था तथा व्यापार कम्पनी र साल्ट ट्रेडिङ कर्पोरेसनमार्फत उपत्यका भित्र र बाहिर सुपथ मूल्य पसल सञ्चालन गरिनेछ ।
वाणिज्य, आपूर्ति तथा उपभोक्ता संरक्षण विभागले टोल–फ्री नम्बरमार्फत उपभोक्ताको गुनासो संकलन गरी तत्काल समाधान गर्नेछ ।
खाद्य प्रविधि तथा गुण नियन्त्रण विभागले दुग्धजन्य पदार्थ, तरकारी, फलफूल, मासु आदि खाद्य सामग्रीको नमूना संकलन, परीक्षण र मोबाइल भ्यानमार्फत निगरानी गरी अखाद्य वस्तुको बिक्री रोक्नेछ ।
गृह मन्त्रालयले जिल्ला प्रशासनमार्फत बजार अनुगमन र कालोबजारी नियन्त्रण गर्नेछ ।
भौतिक पूर्वाधार तथा यातायात मन्त्रालय र गृह मन्त्रालयले लामो दूरीका यात्रुका लागि अनलाइन टिकट बुकिङ, उचित भाडादर र सीट क्षमतामा आधारित व्यवस्थापन लागू गर्नेछन् ।
सडक विभागले असोज १० भित्र अवरुद्ध राजमार्गहरू पुनः सञ्चालनमा ल्याउनेछ ।
संस्कृति, पर्यटन तथा नागरिक उड्डयन मन्त्रालयले उडान संख्या बढाई हवाई यात्रामा अनावश्यक भाडावृद्धि रोक्नेछ ।
कृषि तथा पशुपन्छी विकास मन्त्रालयले प्रदेश र स्थानीय तहसँग सहकार्यमा चौपायामा फैलिएको लम्पी स्किन रोग नियन्त्रण गर्नेछ ।
आन्तरिक राजस्व विभागले वास्तविक कारोबार मूल्यमा बिलबिजक जारी गराउने र अनुगमन सघन गर्नेछ ।
राजस्व अनुसन्धान विभागले गैरकानूनी कारोबार नियन्त्रणका लागि निगरानी कडा गर्नेछ ।