इरान–इजरायल द्वन्द्वमा अमेरिका संलग्न हुन सक्ने ट्रम्पको संकेत
वासिङ्टन , २ असार— पूर्व अमेरिकी राष्ट्रपति डोनाल्ड ट्रम्पले इरान–इजरायलबीच जारी द्वन्द्वमा अमेरिका पनि संलग्न हुन सक्ने संकेत गर्नुभएको छ। साथै, उहाँले रुसी राष्ट्रपति भ्लादिमिर पुटिन सम्भावित मध्यस्थको भूमिकामा रहनसक्ने बताउनुभएको छ।
एबीसी न्यूजसँगको अफ–क्यामेरा अन्तर्वार्तामा ट्रम्पले भन्नुभयो, “हामी द्वन्द्वमा संलग्न हुन सक्छौं। अहिले अमेरिका प्रत्यक्ष सैन्य कारबाहीमा छैन, तर परिस्थिति जटिल बन्दैछ।”उहाँका अनुसार राष्ट्रपति पुटिनले आफूलाई फोन गरेर द्वन्द्व समाधानका लागि मध्यस्थतामा चासो देखाउनु भएको हो। “पुटिन तयार हुनुहुन्छ। यसबारे हामीबीच लामो कुराकानी भएको छ,” ट्रम्पले स्पष्ट पार्नुभयो।
इस्राइलले इरानको आणविक तथा सैन्य संरचनालाई लक्षित गरी पछिल्ला दिनमा गरिरहेका आक्रमणपछि क्षेत्र तनावग्रस्त बनेको छ। आइतबार लगातार तेस्रो दिन पनि इरान–इजरायलबीच भीषण हवाई आक्रमण भएको छ।ओमानले इरान र अमेरिका बीच हुने भनिएको छैटौँ चरणको आणविक वार्ता रद्द भएको जनाएको भएपनि, ट्रम्पले भने दुवै पक्षबीच वार्ता जारी रहेको दाबी गर्नुभएको छ।
वार्ताको कुनै समयसीमा तोकिएको छ कि छैन भन्ने प्रश्नमा ट्रम्पले भन्नुभयो, “अहँ, कुनै डेडलाइन छैन। उनीहरू वार्ता गरिरहेका छन्, र सम्झौता गर्न चाहन्छन्। कुरा अगाडि बढिरहेको छ।” पूर्व राष्ट्रपति ट्रम्पका अनुसार इरान–इजरायल द्वन्द्वले वार्ता प्रक्रियालाई अझ गति दिन सक्नेछ। “वास्तवमा यो परिस्थितिले सम्झौतालाई अगाडि बढाउन बाध्य पार्न सक्छ,” उहाँको भनाइ छ।
