प्रतिनिधिसभाको बैठक आज बस्दै, बजेटसम्बन्धी दुई विधेयक टेबुल हुने

काठमाडौँ, २ असार — सङ्घीय संसद् अन्तर्गत प्रतिनिधिसभाको बैठक आज बिहान ११ बजे संसद् भवन, नयाँ बानेश्वरमा बस्दैछ। बैठकको सम्भावित कार्यसूचीअनुसार, उपप्रधानमन्त्री तथा अर्थमन्त्री विष्णुप्रसाद पौडेलले बजेटसँग सम्बन्धित दुई महत्वपूर्ण विधेयक— ‘विनियोजन विधेयक, २०८२’ र ‘राष्ट्र ऋण उठाउने विधेयक, २०८२’— प्रस्तुत गर्नुहुनेछ।

त्यसका साथै, अर्थमन्त्री पौडेलले आर्थिक वर्ष २०८२/८३ का लागि प्रस्तुत राजस्व तथा व्ययको वार्षिक अनुमानमाथि सांसदहरूले उठाएका जिज्ञासाहरूको जवाफ दिने कार्यक्रम पनि रहेको सङ्घीय संसद् सचिवालयले जनाएको छ।आजको बैठकमा ‘संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशोधन) विधेयक, २०७९’ राष्ट्रियसभाबाट प्राप्त सन्देशसहित टेबुल गरिने कार्यसूची पनि तय गरिएको छ।