केप भर्डेलाई हराउँदै अर्जेन्टिना विश्वकपको अन्तिम १६ मा
काठमाडौं, २० असार – साविक विजेता अर्जेन्टिनाले केप भर्डेमाथि रोमाञ्चक जित निकाल्दै फिफा विश्वकप–२०२६ को अन्तिम १६ मा स्थान सुरक्षित गरेको छ। अमेरिकाको मियामीमा सम्पन्न राउन्ड अफ ३२ अन्तर्गतको खेलमा अर्जेन्टिनाले केप भर्डेलाई ३–२ गोलअन्तरले पराजित गर्दै नकआउट चरणको अर्को यात्रा तय गरेको हो।
अर्जेन्टिनाका कप्तान लियोनल मेसीले खेलको २९औँ मिनेटमा गोल गर्दै टोलीलाई सुरुआती अग्रता दिलाएका थिए। पहिलो हाफसम्म अर्जेन्टिना १–० ले अघि रहेको थियो। दोस्रो हाफमा केप भर्डेले उत्कृष्ट पुनरागमन गर्यो। खेलको ५९औँ मिनेटमा डेरोय डुआर्टेले गोल गर्दै खेल १–१ को बराबरीमा ल्याए। निर्धारित ९० मिनेटमा दुवै टोलीबाट थप गोल हुन नसकेपछि खेल अतिरिक्त समयमा पुगेको थियो।
अतिरिक्त समयको ९२औँ मिनेटमा लिसान्ड्रो मार्टिनेजले गोल गर्दै अर्जेन्टिनालाई पुनः अग्रता दिलाए। तर १०१औँ मिनेटमा सिड्नी लोप्स क्याब्रलले आकर्षक गोल गर्दै केप भर्डेलाई फेरि २–२ को बराबरीमा फर्काए। खेल निर्णायक मोडमा पुगेका बेला १११औँ मिनेटमा केप भर्डेका डाइनी बोर्जेसबाट आत्मघाती गोल भएपछि अर्जेन्टिनाले ३–२ को अग्रता बनायो। त्यसपछि बाँकी समयमा अर्जेन्टिनाले अग्रता जोगाउँदै अन्तिम १६ मा स्थान सुरक्षित गर्यो।
