हेटौँडा कपडा उद्योग पुनः सञ्चालनको तयारी तीव्र
बागमती, असार ८ – दुई दशकभन्दा लामो समयदेखि बन्द अवस्थामा रहेको हेटौँडा कपडा उद्योग पुनः सञ्चालनमा ल्याउने सरकारी तयारीले गति लिएको छ। सरकारको सक्रियतासँगै उद्योगको स्थलगत अनुगमन, सरसफाइ तथा आवश्यक पूर्वतयारीका काम अघि बढाइएको छ। हेटौँडा कपडा उद्योग २०३२ सालमा स्थापना भई २०३५ सालदेखि सञ्चालनमा आएको थियो। तर विभिन्न कारणले २०५७ सालदेखि उद्योग बन्द अवस्थामा छ।
त्यसयता उद्योग पुनः सञ्चालनका लागि पटक–पटक प्रयास भए पनि ठोस उपलब्धि हासिल हुन सकेको थिएन। औद्योगिक क्षेत्र व्यवस्थापन लिमिटेड हेटौँडा कार्यालयका सूचना अधिकारी हिमालय भण्डारीका अनुसार यस वर्ष सरकारले उद्योग पुनः सञ्चालनमा विशेष चासो देखाएपछि सम्बन्धित निकायको सक्रियता बढेको छ। उहाँले उद्योगका अधिकांश उपकरण सामान्य मर्मतपछि पुनः प्रयोग गर्न सकिने अवस्थामा रहेको जानकारी दिनुभयो।
भण्डारीका अनुसार हेटौँडा कपडा उद्योगसँगै त्यसबेला बुटवल धागो कारखाना र नेपालगन्ज कपास उत्पादन कारखाना पनि सञ्चालनमा थिए। हेटौँडा कपडा उद्योग बन्द भएपछि ती उद्योगहरू पनि क्रमशः बन्द भएका थिए। उद्योग पुनः सञ्चालनका लागि प्रधानमन्त्री तथा मन्त्रिपरिषद् कार्यालय ले अग्रसरता लिएको जनाइएको छ। यस क्रममा गौरीकुमारी यादव ले उद्योगको स्थलगत निरीक्षण गर्नुभएको थियो।
साथै मीनाकुमारी लामा, मकवानपुरका प्रमुख जिल्ला अधिकारी तथा अन्य सरोकारवाला निकायका प्रतिनिधिहरूले पनि उद्योग परिसरको अवलोकन गरेका छन्। प्रतिनिधिसभामा आगामी आर्थिक वर्ष २०८३/८४ को बजेटमाथिको छलफलका क्रममा मन्त्री यादवले हेटौँडा कपडा उद्योगलाई यसै आर्थिक वर्षभित्र सञ्चालनमा ल्याउने तयारी भइरहेको जानकारी दिनुभएको थियो।
उहाँले रुग्ण उद्योगहरूमध्ये हेटौँडा कपडा उद्योगलाई पहिलो प्राथमिकतामा राखिएको उल्लेख गर्दै बुटवल धागो उद्योग र कपासखेतीसमेत पुनः सञ्चालनको प्रक्रिया अघि बढाइने बताउनुभएको थियो। उद्योग बन्द भएपछि परिसरमा २०७५ सालदेखि सशस्त्र प्रहरी बलको १४ नम्बर गण बस्दै आएको छ। सुरक्षा व्यवस्थापन सुदृढ भएसँगै उद्योग क्षेत्र सुरक्षित बनेको छ। यसअघि उक्त क्षेत्र लागुऔषध प्रयोगकर्ताहरूको जमघटस्थल बन्न थालेको थियो।
सरकारी चासो बढेसँगै हाल उद्योग परिसरमा सशस्त्र प्रहरी बल नेपाल, नेपाली सेना र नेपाल प्रहरी ले संयुक्त रूपमा सरसफाइ तथा व्यवस्थापनका काम गरिरहेका छन्। सरकारको योजनाअनुसार उद्योग पुनः सञ्चालन हुन सकेमा स्वदेशी कपडा उत्पादन, रोजगारी सिर्जना तथा औद्योगिक क्षेत्रको पुनर्जीवनमा महत्वपूर्ण योगदान पुग्ने अपेक्षा गरिएको छ।
