वैशाखमा मापसेका कारण १२४ सवारी दुर्घटना, १२ जनाको मृत्यु
काठमाडौं, ११ जेठ – मादक पदार्थ सेवन (मापसे) गरेर सवारी साधन चलाउँदा गत वैशाख महिनामा देशभर १२४ वटा सवारी दुर्घटना भएको नेपाल प्रहरी ले जनाएको छ । प्रहरीका अनुसार ती दुर्घटनामा १२ जनाको मृत्यु भएको छ भने १७४ जना घाइते भएका छन् ।
नेपाल प्रहरी का केन्द्रीय प्रवक्ता एवं प्रहरी नायब महानिरीक्षक अविनारायण काफ्ले का अनुसार काठमाडौं उपत्यकाभित्र मात्रै वैशाख महिनामा ३७ वटा सवारी दुर्घटना भएका थिए । ती दुर्घटनामा दुई जनाको मृत्यु हुनुका साथै ५० जना घाइते भएका छन् । प्रदेशगत विवरणअनुसार कोशी प्रदेश मा ३५ दुर्घटनामा दुई जनाको मृत्यु तथा ५३ जना घाइते भएका छन् । मधेश प्रदेश मा २० दुर्घटनामा २७ जना घाइते भएका छन् ।
त्यसैगरी बागमती प्रदेश मा १२ दुर्घटनामा एक जनाको मृत्यु र १९ जना घाइते भएका छन् भने गण्डकी प्रदेश मा पाँच दुर्घटनामा चार जनाको मृत्यु तथा तीन जना घाइते भएका छन् । लुम्बिनी प्रदेश मा नौ दुर्घटनामा तीन जनाको मृत्यु र १५ जना घाइते भएका छन् ।
यस्तै कर्णाली प्रदेश मा तीन दुर्घटनामा तीन जना घाइते भएका छन् भने सुदूरपश्चिम प्रदेश मा भएका तीन दुर्घटनामा चार जना घाइते भएको प्रहरीले जनाएको छ । प्रवक्ता काफ्लेले मापसेका कारण सवारी दुर्घटनाको जोखिम बढ्दै गएको उल्लेख गर्दै ट्राफिक नियमको पालना गर्न सबै चालकलाई आग्रह गरे ।
उनका अनुसार विशेषगरी रातिको समय, सार्वजनिक बिदा तथा पर्व–उत्सवका अवसरमा मादक पदार्थ सेवन गरेर सवारी चलाउने प्रवृत्ति बढी देखिने गरेको छ । उनले मापसे गरी सवारी चलाउनु कानुनी अपराध मात्र नभई मानवीय जीवनका लागि अत्यन्त जोखिमपूर्ण कार्य भएको बताए ।
काठमाडौं उपत्यका ट्राफिक प्रहरी कार्यालय का प्रमुख एवं प्रहरी वरिष्ठ उपरीक्षक नवराज अधिकारी ले पछिल्लो समय देशभर मापसे नियन्त्रण अभियानलाई प्रभावकारी बनाइएको जानकारी दिए । उनका अनुसार सहरी क्षेत्र, राजमार्ग, व्यस्त चोक तथा रातिको समयमा ट्राफिक चेकजाँच कडा पारिएको छ ।
मापसे गरी सवारी चलाउने चालकलाई कानुनअनुसार कारबाही गर्नुका साथै जनचेतनामूलक कार्यक्रमसमेत सञ्चालन भइरहेको प्रहरीले जनाएको छ । प्रहरीका अनुसार मादक पदार्थ सेवनपछि चालकको निर्णय क्षमता कमजोर हुने, सवारी नियन्त्रणमा कठिनाइ हुने तथा तीव्र गतिमा सवारी चलाउने प्रवृत्ति बढ्ने भएकाले दुर्घटनाको सम्भावना उच्च रहने गर्दछ ।
