मकवानपुरमा दूध बोक्ने गाडी दुर्घटना हुँदा एकजनाको मृत्यु

काठमाडौँ, १७ असोज – मकवानपुरको बकैया गाउँपालिकामा दूध बोक्ने गाडी दुर्घटना हुँदा एकजनाको मृत्यु भएको छ। दुर्घटनामा अर्का एकजना घाइते भएका छन्। बुधबार बिहान बकैया गाउँपालिका ५ सिरपुर ओरालोमा दूध बोक्ने ना १ घ ५४४ नम्बरको गाडी सडकबाट करिब दुई सय मिटर तल खसेको हो।

उक्त दुर्घटनामा हेटौंडा उपमहानगरपालिका ९ लामसुरे निवासी चालक सिद्धान्त लामाको मृत्यु भएको हो। दुर्घटनामा लामसुरे निवासी सह-चालक प्रेम अधिकारी घाइते भएका छन्। उनको अहिले उपचार भइरहेको छ।

जिल्ला प्रहरी कार्यालय मकवानपुरका अनुसार दूध लिन हेटौंडाबाट बकैया गाउँपालिकातर्फ गइरहेको गाडी ओरालोमा अनियन्त्रित भएर पल्टिएको हो।