सहिद स्मारक ए डिभिजन लिगमा आजदेखि दोस्रो चरणका खेल हुँदै

काठमाडौँ, १० मङ्सिर – सहिद स्मारक ए डिभिजन लिगमा आजदेखि दोस्रो चरणका खेल हुँदै छन्। दोस्रो चरणको पहिलो दिन आज दुई खेल हुँदै छन्।

पहिलो खेल दिउँसो १ बजे सातदोबाटो र थ्रीस्टार क्लबबीच सुरु हुनेछ। यसअघि पहिलो चरणको खेलमा सातदोबाटोले फ्रेन्ड्स क्लबसँग बराबरी खेलेको थियो भने थ्रीस्टारले च्यासललाई हराउँदै विजयी सुरुवात गरेको थियो।

आजको दोस्रो खेल पौने पाँच बजे संकटा र फ्रेन्ड्स क्लबबीच हुनेछ। यी दुवै टोलीले पहिलो चरणको आ–आफ्नो खेलमा बराबरीको नतिजा हात पारेका थिए। अखिल नेपाल फुटबल संघ (एन्फा)का अनुसार दोस्रो चरणका सबै खेल दशरथ रंगशालामा हुनेछ।