विद्यालयको ३१ बिघाभन्दा बढी जमिन अतिक्रमणमा
पशुपतिनगर, २१ वैशाख – करफोक विद्यामन्दिर माध्यमिक विद्यालय को झापास्थित ३१ बिघाभन्दा बढी जमिन बिचौलिया र स्थानीयको कब्जामा परेको पाइएको छ । विद्यालयका नाममा दर्ता रहेको उक्त जग्गा कनकाई नगरपालिका, शिवसताक्षी नगरपालिका र अर्जुनधारा नगरपालिका मा फैलिएको छ ।
कुल ३१ बिघा १६ कट्ठा १५ धुर क्षेत्रफलको यो जमिन लामो समयदेखि भाडामा खेती गर्न दिइए पनि पछिल्लो समय अनधिकृत रूपमा बिक्री र संरचना निर्माण हुन थालेको हो । विद्यालयका प्रधानाध्यापक गणेशप्रसाद आचार्य का अनुसार कनकाई क्षेत्रमा मात्रै १४ वटा पक्की घर निर्माण भइसकेका छन् भने अन्य स्थानमा पनि संरचना विस्तार भइरहेको छ ।
अर्जुनधारामा छ वटा पक्की घर बनेका छन् भने शिवसताक्षीमा अझै पक्की संरचना बन्न नपाएको जनाइएको छ । भाडामा लिएको जमिन बिचौलियाले टुक्र्याएर प्रतिकट्ठा सात लाख रुपैयाँभन्दा बढीमा बिक्री गर्ने र घर निर्माण गर्ने क्रम बढेपछि समस्या जटिल बनेको हो । कतिपय स्थानमा फनपार्क निर्माण गर्ने कामसमेत भइरहेको जनाइएको छ ।
विद्यालयले यस विषयमा सूर्योदय नगरपालिका तथा सम्बन्धित पालिकाहरूलाई जानकारी गराउँदै संरचना निर्माण रोक्न आग्रह गरेको छ । कनकाई नगरपालिकाले सार्वजनिक सूचना जारी गर्दै अवैध निर्माण नगर्न चेतावनी दिएको छ । राजेन्द्रकुमार पोखरेल ले विद्यालयको जमिन चरम अतिक्रमणमा परेको बताउँदै यसलाई खाली गराउन सहयोग गर्ने प्रतिबद्धता जनाएका छन् ।
त्यस्तै, इलामका प्रमुख जिल्ला अधिकारी लक्ष्मण ढकाल ले आवश्यक कागजात संकलनपछि समन्वय गरेर जमिन खाली गराउने प्रक्रिया अघि बढाइने बताएका छन् । विद्यालयले उक्त जमिनबाट वार्षिक करिब तीन लाख रुपैयाँ आम्दानी गर्दै आएको छ र हालसम्म नियमित रूपमा मालपोत कर तिर्दै आएको जनाएको छ ।
