राष्ट्रपतिद्वारा एकता, सुशासन र आर्थिक समृद्धिमा जोड
काठमाडौँ, २८ चैत – रामचन्द्र पौडेल ले गणतन्त्रको सुदृढीकरण, राष्ट्रिय एकता र आर्थिक समृद्धिका लागि सबै पक्ष एकताबद्ध भएर अघि बढ्नुपर्ने बताएका छन् । सङ्घीय संसद् को संयुक्त बैठकलाई शुक्रबार सम्बोधन गर्दै राष्ट्रपतिले विगतका कटुताबाट पाठ सिक्दै जुटेर अघि बढ्नुपर्नेमा जोड दिएका हुन् । “हामी फुटेर होइन, जुटेर अघि बढ्नुपर्छ,” उनले सम्बोधनमा भने ।
राष्ट्रपतिले विषम परिस्थितिमा पनि प्रतिनिधि सभा निर्वाचन सफलतापूर्वक सम्पन्न गरेकोमा सबै सरोकारवालालाई धन्यवाद दिएका छन् । अन्तरिम सरकारले आफ्नो दायित्व पूरा गरेको उल्लेख गर्दै उनले सुशासन प्रवर्द्धन, भ्रष्टाचार न्यूनीकरण र सेवा प्रवाह सुधारमा राज्य संयन्त्रले देखाएको प्रयासको प्रशंसा गरे ।
निर्वाचनमार्फत युवाको अभूतपूर्व सहभागिता देखिएको उल्लेख गर्दै उनले यसले लोकतान्त्रिक प्रणालीप्रति युवापुस्ताको विश्वास र आकर्षण बढेको सन्देश दिएको बताए । साथै, नागरिकका अपेक्षा पूरा गर्न संसद्ले जनकेन्द्रित तथा कल्याणकारी कानुन निर्माण गर्नुपर्नेमा जोड दिए ।
उनले कानुनको प्रभावकारी कार्यान्वयन, छिटोछरितो न्याय सेवा, र संविधान कार्यान्वयनमा अझै धेरै काम बाँकी रहेको उल्लेख गरे । युवाका लागि रोजगारी सिर्जना, सीपमूलक शिक्षा, श्रम संस्कृतिको सम्मान र उचित पारिश्रमिकमा पनि उनले जोड दिएका छन् ।
भ्रष्टाचार नियन्त्रण तथा सुशासनका लागि सेवा प्रवाहमा सुधार आवश्यक रहेको उल्लेख गर्दै राष्ट्रपतिले नागरिकले “घरदैलोमै सरकार भएको अनुभूति” गर्ने वातावरण बनाउनुपर्ने बताए । विश्व परिवेशमा देखिएका द्वन्द्वबीच राष्ट्रिय हितलाई केन्द्रमा राखी सन्तुलित कूटनीतिक सम्बन्ध अघि बढाउनुपर्ने आवश्यकता औंल्याउँदै उनले विकास र समृद्धिको यात्रामा संसद् प्रभावकारी हुने विश्वास व्यक्त गरे ।
यस्तै, नेपाल चेम्बर अफ कमर्स को ७५औँ वार्षिक साधारण सभा तथा हीरक जयन्ती समारोहलाई सम्बोधन गर्दै राष्ट्रपतिले निजी क्षेत्रलाई राष्ट्र निर्माणको साझेदारका रूपमा हेर्नुपर्ने बताएका छन् । उनका अनुसार व्यापार, उद्योग र आर्थिक क्रियाकलापको विस्तार नै समृद्धिको आधार हो । “निजी क्षेत्र सबल भए मात्र अर्थतन्त्र बलियो हुन्छ,” उनले भने ।
राष्ट्रपतिले राजनीतिक स्थिरता, स्पष्ट नीति र दिगो रणनीतिबाट मात्रै औद्योगिक विकास, लगानी विस्तार र रोजगारी सिर्जनामा गति आउने उल्लेख गर्दै युवालाई स्वदेशमै अवसर सिर्जना गर्नुपर्नेमा जोड दिएका छन् ।
