प्रदेश नं १ को पहाडी भेगका एक दुई स्थानमा छिटपुटदेखि हल्का वर्षाको सम्भावना
काठमाडौं, १० फागुन – पश्चिमी वायुको आंशिक प्रभावले प्रदेश नं १ र बागमती प्रदेशका पहाडी भेगलगायत कर्णाली र सूदुरपश्चिम प्रदेशमा मौसम आंशिकदेखि सामान्य बदली भएको छ। देशका बाँकी स्थानमा भने आंशिक बदली देखि मौसम सामान्यतया सफा रहेको मौसम पूर्वानुमान महाशाखाले जनाएको छ।
महाशाखाका अनुसार दिउँसो प्रदेश १, बागमती र गण्डकी प्रदेशका पहाडी भेगमा आंशिकदेखि सामान्य बदली रही देशका बाँकी स्थानमा आंशिक बदली रहनेछ। प्रदेश नं १ को पहाडी भेगका एक दुई स्थानमा छिटपुटदेखि हल्का वर्षाको सम्भावना छ। प्रदेश नं १ र बागमती प्रदेशका उच्च पहाडी तथा हिमाली क्षेत्रका एक दुई स्थानमा हल्का हिमपातको सम्भावना छ।
महाशाखका अनुसार राति प्रदेश नं १ का पहाडी भेगमा आंशिक बदली रही देशका बाँकी स्थानमा आंशिक बदलीदेखि मौसम सामान्यतया सफा रहनेछ। गण्डकी प्रदेशका उच्च पहाडी तथा हिमाली भेगका एक दुई स्थानमा हल्का हिमपातको सम्भावना छ।
