मौसम पूर्वानुमान : देशभर बदली,चट्याङ, हावाहुरी, वर्षा र हिमपातको सम्भावना
काठमाडौँ, २५ चैत – मौसम पूर्वानुमान महाशाखा का अनुसार हाल नेपालमा पश्चिमी न्यूनचापीय प्रणाली र स्थानीय वायुको प्रभाव रहेको छ। यसको प्रभावका कारण गण्डकी प्रदेश, लुम्बिनी प्रदेश, कर्णाली प्रदेश र सुदूरपश्चिम प्रदेश लगायत बागमती प्रदेश र कोशी प्रदेश का हिमाली भूभागमा सामान्य बदली रहेको छ भने अन्य क्षेत्रमा मौसम मुख्यतया सफा रहेको छ।
आज दिउँसो गण्डकी, लुम्बिनी, कर्णाली र सुदूरपश्चिम प्रदेशमा पूर्ण बदली रहनेछ भने बाँकी क्षेत्रमा पनि सामान्य बदली रहनेछ। ती प्रदेशका धेरै स्थानमा तथा कोशी र बागमती प्रदेशका पहाडी–हिमाली क्षेत्रमा केही स्थानमा, साथै मधेस प्रदेश लगायत तराईका थोरै स्थानमा चट्याङ, हावाहुरी र असिनासहित मध्यम वर्षा तथा हिमपातको सम्भावना रहेको छ।
त्यस्तै गण्डकी, लुम्बिनी, कर्णाली र सुदूरपश्चिम प्रदेशका पहाडी तथा हिमाली भूभागका एक–दुई स्थानमा भारी वर्षा र हिमपातको सम्भावना रहेको छ। मधेस, लुम्बिनी, गण्डकी, बागमती र कोशी प्रदेशका केही स्थानमा हावाहुरी चल्ने सम्भावना पनि रहेको महाशाखाले जनाएको छ।
आज राति भने देशभर सामान्य बदली रहनेछ। कोशी प्रदेश, मधेस प्रदेश, लुम्बिनी प्रदेश, कर्णाली प्रदेश र सुदूरपश्चिम प्रदेश लगायत पहाडी तथा हिमाली भूभागका धेरै स्थानमा तथा तराईका केही स्थानमा चट्याङसहित मध्यम वर्षा र हिमपातको सम्भावना रहेको छ।
