भोटेकोशी बाढीमा १ हजार ३४४ शव फेला, ४ हजार ८९८ अझै बेपत्ता
रसुवा, २० भदौ – भोटेकोशी नदीमा आएको विनाशकारी बाढीमा परी बेपत्ता तथा मृत्यु भएका १ हजार ३४४ जनाको शव फेला परेको नेपाल प्रहरीले जनाएको छ। प्रहरीको पछिल्लो अद्यावधिक तथ्याङ्कअनुसार अझै ४ हजार ८९८ जना बेपत्ता छन्। फेला परेका शवमध्ये ४८९ पुरुष, २६९ महिला, ५२ बालक र ३३ बालिका रहेका छन्। यस्तै, ५०१ वटा मानव शरीरका आंशिक अङ्ग फेला परेका छन्, जसको पहिचान हुन बाँकी रहेको प्रहरीले जनाएको छ।
बेपत्ता ४ हजार ८९८ जनामध्ये २ हजार ९३० नेपाली र ६१८ विदेशी नागरिक रहेका छन्। बेपत्ता नेपालीमा २ हजार ४४८ पुरुष र ४८२ महिला छन्। थप १ हजार ३५० जनाको बेपत्ता भएको जानकारी फोनमार्फत प्राप्त भएको प्रहरीले जनाएको छ। बाढी प्रभावित क्षेत्रबाट हालसम्म ८ हजार ६३१ जनाको जीवितै उद्धार गरिएको छ। उद्धार गरिएकामध्ये ७ हजार ३८७ नेपाली र १ हजार २४४ विदेशी नागरिक रहेका छन्।
बाढीका कारण विस्थापित भएका ३ हजार ६५५ जनालाई विभिन्न होल्डिङ सेन्टरमा राखिएको छ। खोज तथा उद्धारका लागि ७ हजार २१२ जना प्रहरी परिचालन गरिएको प्रहरीले जनाएको छ। उद्धार तथा राहत कार्यमा खटिएका ६५ प्रहरी कर्मचारीसमेत बाढीबाट प्रभावित भएका छन् भने २५ जना प्रहरी अझै सम्पर्कविहीन रहेको प्रहरीको तथ्याङ्क छ।
फेला परेका शवमध्ये १ हजार ३० वटाको जमिनमा गाडेर व्यवस्थापन गरिएको छ। शव पहिचानका लागि डीएनए नमुना सङ्कलनलाई पनि तीव्र पारिएको छ। हालसम्म १ हजार २६० मृतक र ९७२ मृतकका आफन्त गरी २ हजार २३२ जनाको डीएनए नमुना सङ्कलन गरिएको प्रहरीले जनाएको छ। पहिचान हुन नसकेका १ हजार २७० जनाको विवरण प्रहरीको वेबसाइटमा सार्वजनिक गरिएको छ।
