इरानका दिवंगत सर्वोच्च नेता अली खामेनीको अन्त्येष्टि प्रक्रिया सुरु
तेहरान, २२ असार – इरानका दिवंगत सर्वोच्च नेता अली खामेनीको अन्त्येष्टि प्रक्रिया आइतबार राजधानी तेहरानबाट सुरु भएको छ। शोकसभामा हजारौँ नागरिकका साथै सरकारका उच्च अधिकारीहरूको सहभागिता रहेको छ। समारोहमा खामेनीका छोराहरू मसुद, मोस्तफा र मेइशम उपस्थित थिए। साथै, राष्ट्रपति मसुद पेजेस्कियान र रिभोलुसनरी गार्डका प्रमुख अहमद वाहिदीले पनि श्रद्धाञ्जली अर्पण गरेका थिए।
यद्यपि, नयाँ सर्वोच्च नेता मोज्तबा खामेनी भने अन्त्येष्टि समारोहमा उपस्थित भएनन्। गत मार्चमा सर्वोच्च नेताको जिम्मेवारी सम्हालेयता उनी सार्वजनिक रूपमा देखिएका छैनन्। पितामाथि भएको अमेरिकी र इजरायली हवाई आक्रमणका क्रममा मोज्तबा पनि घाइते भएको हुन सक्ने चर्चा भइरहेका बेला अन्त्येष्टिमा उनको अनुपस्थितिले थप अड्कलबाजी जन्माएको छ। यद्यपि, यसबारे इरानी अधिकारीहरूले कुनै आधिकारिक जानकारी सार्वजनिक गरेका छैनन्।
केही अन्तर्राष्ट्रिय सञ्चारमाध्यमले सुरक्षा कारणले उनी सार्वजनिक कार्यक्रममा सहभागी नभएको हुन सक्ने अनुमान गरेका छन्। सन् १९८९ देखि इरानको सर्वोच्च नेताका रूपमा रहेका अली खामेनीको गत फेब्रुअरीमा निधन भएको जनाइएको छ। इरानी अधिकारीहरूले अन्त्येष्टि कार्यक्रमलाई “शताब्दीकै ठूलो अन्त्येष्टि”को संज्ञा दिएका छन्। इरान र इराकमा हुने विभिन्न श्रद्धाञ्जली कार्यक्रममा एक करोड २० लाखदेखि दुई करोडसम्म मानिस सहभागी हुने अपेक्षा गरिएको छ।
हाल खामेनीको पार्थिव शरीर तेहरानस्थित ग्रान्ड मोसल्ला धार्मिक परिसरमा राखिएको छ। आइतबार इरानभर सार्वजनिक बिदा दिइएको थियो। सोमबार तेहरानमा पार्थिव शरीरको नगर परिक्रमा गराइने, मंगलबार कोम र बुधबार इराक लगिने तथा बिहीबार पैतृक सहर मशहदमा अन्त्येष्टि गरिने कार्यक्रम तय गरिएको छ। यसैबीच, अमेरिकी राष्ट्रपति डोनाल्ड ट्रम्पले अन्त्येष्टि कार्यक्रमका कारण इरानसँगको शान्ति वार्ता एक साताका लागि स्थगित भएको बताएका छन्।
उनले इरानी नेतृत्वबारे दिएको अभिव्यक्तिप्रति व्यापक प्रतिक्रिया आएको छ। ट्रम्पको भनाइको विरोध गर्दै अन्त्येष्टिमा सहभागी ५० वर्षीया जहरा सफाआईले इरानी नागरिकको शोकलाई “नक्कली” भन्नु अपमानजनक भएको प्रतिक्रिया दिइन्। समारोहका क्रममा सहभागीहरूले अमेरिका र इजरायलविरुद्ध नाराबाजी गरेका थिए।
