ओपोको विज्ञापन विवादपछि चीनमा पारिवारिक मूल्यबारे बहस चर्कियो

चीन मा विवाहदर लगातार घटिरहेका बेला पारिवारिक मूल्य र सामाजिक नैतिकतासम्बन्धी बहस फेरि चर्किएको छ। उपभोक्ता इलेक्ट्रोनिक्स कम्पनी ओपोले सार्वजनिक गरेको एउटा विज्ञापन विवादमा तानिएपछि चिनियाँ सरकारी निकायहरूले त्यसलाई ‘अनुचित’ भन्दै आलोचना गरेका छन्।

सामाजिक सञ्जाल प्लेटफर्म वेइबोमा शुक्रबार सार्वजनिक गरिएको प्रचार सामग्रीमा “मेरी आमाका दुई ‘पति’ छन्, एक मेरा बुबा हुन्, अर्को वर्षमा दुई पटक देखापर्छन्” भन्ने वाक्य प्रयोग गरिएको थियो। कम्पनीका अनुसार यहाँ प्रयोग गरिएको दोस्रो ‘पति’ शब्द वास्तविक वैवाहिक सम्बन्ध नभई महिलाहरूले मन पराउने सेलिब्रेटीप्रतिको आकर्षणलाई व्यङ्ग्यात्मक शैलीमा प्रस्तुत गर्न प्रयोग गरिएको थियो।

आधुनिक चिनियाँ आमाहरूको विविध जीवनशैली देखाउने उद्देश्यले विज्ञापन तयार गरिएको ओपोले जनाएको थियो। तर पोस्ट सार्वजनिक भएलगत्तै सामाजिक सञ्जालमा आलोचना सुरु भयो। त्यसपछि ओपोले विज्ञापन हटाउँदै वक्तव्य जारी गरेर यसको उद्देश्य गलत रूपमा बुझिएको दाबी गर्‍यो। कम्पनीले पारिवारिक सम्बन्ध वा सामाजिक मूल्यलाई अपमान गर्ने कुनै आशय नरहेको स्पष्ट पारेको थियो।

विवाद बढ्दै गएपछि झेजियाङ प्रान्त प्रचार विभाग ले आइतबार विज्ञप्ति जारी गर्दै “दुई पति कुनै पनि हिसाबले रमाइलो विषय होइन” भन्दै आलोचना गरेको छ। विभागले युवापुस्तालाई आकर्षित गर्ने नाममा सामाजिक संवेदनशीलता बेवास्ता नगर्न ब्रान्डहरूलाई चेतावनी दिएको छ। स्थानीय सञ्चारमाध्यमका अनुसार चाइना एडभरटाइजिङ एसोसिएसन ले पनि उक्त विज्ञापनलाई नैतिक सीमाभन्दा बाहिर गएको टिप्पणी गरेको छ।

विवादपछि ओपोले सोमबार एक वरिष्ठ उपाध्यक्षसहित केही मार्केटिङ प्रबन्धकलाई अनुशासनात्मक कारबाही गरिएको जनाएको छ। कम्पनीले उनीहरूले “मुख्यधाराको सामाजिक मूल्यलाई बेवास्ता गरेको” निष्कर्ष निकालिएको बताएको छ। यो विवाद चीनमा घट्दो विवाहदर र जन्मदरप्रति सरकारको बढ्दो चिन्ताका बीच सार्वजनिक भएको हो। पछिल्लो दशकमा चीनको जन्मदर झन्डै आधाले घटेको छ।

त्यसपछि चीनको नागरिक मामिला मन्त्रालय ले विवाह, परिवार र सन्तान जन्मलाई प्रोत्साहन गर्ने नीति अघि बढाइरहेको छ। मन्त्रालयले हालै सार्वजनिक गरेको तथ्याङ्कअनुसार यस वर्षको पहिलो तीन महिनामा करिब १७ लाख विवाह दर्ता भएका छन्, जुन गत वर्षको सोही अवधिको तुलनामा ६.२ प्रतिशतले कम हो।

यद्यपि सरकारी निकायले विज्ञापनलाई परिवार र आमाप्रति असम्मानजनक भने पनि सामाजिक सञ्जालका धेरै प्रयोगकर्ताले भने प्रतिक्रियालाई अतिरञ्जित बताएका छन्। वेइबोमा केही प्रयोगकर्ताले उक्त विज्ञापनलाई सामान्य व्यङ्ग्यका रूपमा लिँदै सरकारी प्रतिक्रिया अत्यधिक कडा भएको टिप्पणी गरेका छन्।