पर्यटकीयस्थल घोडेपानी जोड्ने सडक स्तरोन्नति योजना लक्ष्यअघि नै सम्पन्न

म्याग्दी, २३ माघ – अन्नपूर्ण गाउँपालिकाको केन्द्र पोखरेबगरदेखि पर्यटकीयस्थल घोडेपानी जोड्ने सडक स्तरोन्नतिका लागि सञ्चालित योजना लक्ष्यभन्दा दुई महिनाअघि नै सम्पन्न भएको छ।

अन्नपूर्ण गाउँपालिकाले चालु आर्थिक वर्षमा रु ५० लाख बजेट विनियोजन गरेको पोखरेबगर–घार–चित्रे सडक योजनाअन्तर्गत प्रतिस्पर्धामा छनोट भएको निर्माण कम्पनीले काम थालेको दुई महिनामै सम्पन्न गरेको हो।

विसं २०८२ चैत ३० गतेसम्म सम्पन्न गर्ने लक्ष्यसहित गत मङ्सिर २८ गते रु ३६ लाख १८ हजार ३४३ मा ठेक्का सम्झौता गरेको एसएस बिल्डर्स प्रालिले यसै हप्ता काम सम्पन्न गरेको अन्नपूर्ण गाउँपालिकाका प्रमुख प्रशासकीय अधिकृत कपिल पाण्डेले बताउनुभयो।

घारको बिरौटा चोकदेखि भुन्या खण्डमा यसअघि सोलिङ गरिएको ठाउँमा ३०० मिटर आरसिसी ढलान गरिएको उहाँले जानकारी दिनुभयो। अन्नपूर्ण गाउँपालिका–६ मा पर्ने पोखरेबगर–घोडेपानी सडक पोखराबाट मुस्ताङ जोड्ने वैकल्पिक मार्गसमेत हो।

वडा नं ६ का अध्यक्ष रामबहादुर खड्काले सडक ढलानपछि स्थानीयवासी र घोडेपानी–पुनहिल भ्रमणमा आउने पर्यटकलाई सहज भएको बताउनुभयो।

निर्माण व्यवसायीले पर्याप्त मजदुर, उपकरण परिचालन र निर्माण सामग्री व्यवस्थापन गरी लक्ष्यभन्दा अगाडि नै सडक निर्माण गरेको उहाँले बताउनुभयो।

पोखरेबगरदेखि घोडेपानी जोड्ने २१ किलोमिटर दूरीको यो सडक अन्नपूर्ण गाउँपालिका–५ र ६ का बासिन्दाका साथै घोडेपानी–पुनहिल घुम्न आउने पर्यटकले प्रयोग गर्छन्। घोडेपानीदेखि कास्कीको उल्लेरी–बिरेठाँटी हुँदै मध्यपहाडी लोकमार्गको नयाँपुलसम्म पनि सडक मार्ग खुलेको छ।

गण्डकी प्रदेश सरकारमार्फत पोखरेबगर–घोडेपानी सडकको चित्रे–घोडेपानी खण्डको तीन किलोमिटर सडक फराकिलो पार्ने, नाली र टेवा पर्खाल बनाएर स्तरोन्नति गर्ने आयोजना सञ्चालनमा रहेको छ।

यस्तै, पोखरेबगर–बिरौटा खण्डको कुरमुनी र लुलिया घुम्तीको पहिरो प्रभावित क्षेत्रमा पहिरो रोकथाम र सडक स्तरोन्नति गर्न सङ्घीय सरकारले चालु आर्थिक वर्षमा रु तीन करोड विनियोजन गरेको थियो।

तर स्थानीय पूर्वाधार आयोजना कास्कीअन्तर्गतको उक्त योजनाको बजेट सरकारले रोक्का गरेकाले कार्यान्वयन अघि नबढेको र यसका लागि पहल भइरहेको वडाध्यक्ष खड्काले बताउनुभयो।

उक्त सडकको घोप्टेखर्क क्षेत्रमा पहिरोका कारण साँघुरिएको सडकमा गाउँपालिकाले कुनातर्फ पर्खाल निर्माण गरी फराकिलो पार्दै यातायात सञ्चालनको व्यवस्था मिलाएको छ।

वार्षिक करिब ३० हजार विदेशी पर्यटक आउने घोडेपानीमा त्यसभन्दा बढी आन्तरिक पर्यटक भ्रमणमा आउने गर्छन्। पहाडको टाकुरामा अवस्थित घोडेपानी र नजिकैको पुनहिल सूर्योदय दृश्य, हिमशृङ्खला, पहाडी भूगोल, गुराँसे जङ्गल, वन्यजन्तु, पन्छी र मगर संस्कृतिजस्ता आकर्षणका कारण पर्यटकको प्रमुख गन्तव्य बनेको छ।