पाँच वर्षमा छ पटक म्याद थपेर मात्रै कालोपत्र थालियो रेश सडक

कोरोना महामारी, आर्थिक अभाव र भुक्तानी जस्ता कारण देखाउँदै निर्माण कम्पनीले लामो समयसम्म काम अघि बढाएको थिएन। तर, अहिले सडकमा तीव्र रूपमा ग्राभेल र कालोपत्रको तयारी भइरहेको छ। यो सडक संघीय सरकार र काठेखोला गाउँपालिकाको साझेदारीमा निर्माण भइरहेको हो। विसं २०७७ जेठमा दुई वर्षभित्र सम्पन्न गर्ने गरी जोशी–निशान–आचार्य जेभीसँग रु ६ करोड ७१ लाखमा ठेक्का सम्झौता भएको थियो।

तर, सम्झौता अवधिभर काम प्रगति नभएपछि ठेक्का म्याद छ पटकसम्म थपिएको हो। काठेखोला गाउँपालिकाका इञ्जिनियर विनोद लामिछानेका अनुसार, करिब एक वर्षदेखि फिल्डमा अनुपस्थित निर्माण कम्पनी पुनः सक्रिय बनेको छ। अहिले सडकमा कालोपत्रको तयारी तीव्र रूपमा भइरहेको छ।

उहाँका अनुसार, सडकका पूर्वाधारका काम पहिले नै सम्पन्न भए पनि कालोपत्र हुन नसक्दा ती संरचना समेत जीर्ण बनेका थिए। हालसम्म सडकको ७० प्रतिशत भौतिक र ६५ प्रतिशत आर्थिक प्रगति भएको छ। लामिछानेले १४औँ खरिद संशोधनका आधारमा अन्तिम पटक म्याद थपिएको जानकारी दिनुभयो। “यस पटक कालोपत्रका लागि आवश्यक उपकरण र कच्चा सामग्रीको व्यवस्था भइसकेको छ,” उहाँले भन्नुभयो।

निर्माण व्यवसायी प्रकाश आचार्यले कोरोना महामारी, भुक्तानीको ढिलाइ र कच्चा सामग्रीको अभावका कारण काम प्रभावित भएको स्वीकार गर्दै अब भने छिट्टै कालोपत्र पूरा गरी सडक हस्तान्तरण गर्ने प्रतिबद्धता जनाउनुभयो। यो सडक बरेङ–शान्तिपुर जाने यात्रुहरूका लागि पनि महत्वपूर्ण मार्ग भएकाले स्थानीयवासीले काम तीव्र गतिमा अघि बढेकोमा राहत महसुस गरेका छन्।