नेपाली गलैंचाको तेस्रो मुलुकतर्फ निर्यात सुरु
पर्सा, २ साउन – बारा–पर्सा औद्योगिक कोरिडोरमा अवस्थित प्रेस्टिज कार्पेट इन्डस्ट्रीजले आफ्ना गलैंचा उत्पादन तेस्रो मुलुकतर्फ निर्यात गर्न थालेको छ। उद्योगले हालै वीरगञ्जस्थित सुक्खा बन्दरगाहमार्फत करिब ३० हजार वर्गमिटर गलैंचा संयुक्त अरब इमिरेट्स (यूएई), केन्या र संयुक्त राज्य अमेरिकासहितका मुलुकमा निर्यात गरेको हो।
उद्योगका युनाइटेड सञ्चालक अमन साह का अनुसार, यसअघि भारतमै सीमित रहेको निर्यात अब अन्तर्राष्ट्रिय बजारसम्म विस्तार भएको छ। “करीब एक करोड रुपैयाँ बराबरको गलैंचा तेस्रो मुलुकमा पठाइएको छ,” साहले भन्नुभयो, “यो हाम्रो लागि एउटा नयाँ सफलता हो, जुन लामो प्रयासपछि सम्भव भयो।”
जितपुर–सिमरा उपमहानगरपालिका–२३ मा रहेको उद्योगले हाल १०० जनालाई रोजगारी प्रदान गरिरहेको छ। उद्योगको वार्षिक उत्पादन क्षमता २० लाख वर्गमिटर रहेको छ। यहाँ उत्पादन हुने गलैंचाको मूल्य प्रतिवर्गमिटर रु ९०० देखि रु ४,००० सम्म रहेको उद्योगले जनाएको छ। हालसम्म उद्योगमा ४० करोड रुपैयाँको लगानी भइसकेको छ।
यस सन्दर्भमा वीरगञ्ज उद्योग वाणिज्य संघका अध्यक्ष हरि गौतम ले नेपाली उद्योगले विदेशबाट कच्चा पदार्थ आयात गरी तयार उत्पादन पुनः निर्यात गर्नु सकारात्मक संकेत भएको टिप्पणी गर्नुभयो। “यो सफलताले औद्योगिक विकास र विदेशी मुद्रा आम्दानीमा टेवा पुग्ने विश्वास लिन सकिन्छ,” उहाँले भन्नुभयो।
