बैंककको बारमा भीषण आगलागी कम्तीमा २७ जनाको मृत्यु, ६० भन्दा बढी घाइते
बैंकक, २९ असार – थाइल्यान्डको राजधानी बैंककस्थित एक लोकप्रिय बारमा भीषण आगलागी हुँदा कम्तीमा २७ जनाको मृत्यु भएको छ भने ६० भन्दा बढी घाइते भएका छन्। आगलागीपछि घाइतेहरूलाई विभिन्न अस्पतालमा भर्ना गरिएको छ भने केहीको अवस्था गम्भीर रहेको जनाइएको छ। थाइल्यान्डका प्रधानमन्त्री अनुटिन चार्नभिराकुलका अनुसार चाटुचक जिल्लास्थित रोङ बियर ना लात फ्राओ बारबाट २७ जनाको शव निकालिएको छ।
मृतकमध्ये नौ पुरुष र १८ महिला रहेका छन्। आगलागीको कारणबारे विस्तृत अनुसन्धान भइरहेको अधिकारीहरूले बताएका छन्। प्रत्यक्षदर्शीका अनुसार आइतबार मध्यराततिर स्टेज नजिकको विद्युत् सर्किट ब्रेकरबाट धुवाँ निस्किएपछि केहीबेरमै विस्फोट भएको थियो। त्यसपछि विद्युत् आपूर्ति बन्द भई बार धुवाँले भरिएको र आगो तीव्र रूपमा फैलिएको बताइएको छ।
आगो लागेपछि ग्राहकहरू मुख्य ढोकाबाट बाहिर निस्कन खोज्दा भागदौड मच्चिएको थियो। सामाजिक सञ्जालमा सार्वजनिक भएका भिडियोहरूमा बारबाट आगोको ठूलो लप्का निस्किएको, मानिसहरू चिच्याउँदै भागिरहेको तथा केही व्यक्ति लडेको दृश्य देखिएको छ। अग्निनियन्त्रकहरूले करिब आधा घण्टापछि आगो नियन्त्रणमा लिए पनि त्यसअघि नै ठूलो मानवीय क्षति भइसकेको थियो।
प्रधानमन्त्री चार्नभिराकुलका अनुसार अधिकांश पीडित आगो र बाक्लो धुवाँबाट बच्न बारको पछाडिपट्टि रहेका शौचालयतर्फ भागेका थिए। तर त्यहाँ सुरक्षित निकास नहुँदा धेरैको निसास्सिएर मृत्यु भएको प्रारम्भिक अनुमान गरिएको छ। अधिकांश शव पनि शौचालय क्षेत्रबाटै फेला परेका छन्।
बैंककका गभर्नर चाटचार्ट सिट्टिपुन्टले बारभित्र प्रयोग गरिएका प्रज्वलनशील सजावटी सामग्रीका कारण आगो तीव्र गतिमा फैलिएको हुन सक्ने प्रारम्भिक अनुमान व्यक्त गर्नुभएको छ। साथै केही पसलहरूले आपत्कालीन निकास अवरुद्ध गरेको हुन सक्ने सूचना प्राप्त भएको भन्दै त्यसबारे फरेन्सिक टोलीले अनुसन्धान गरिरहेको बताउनुभयो।
घटनास्थलबाट सार्वजनिक भएका तस्बिरहरूमा बारको भित्री भाग पूर्ण रूपमा जलेर नष्ट भएको तथा बाहिर मृतकका शव राखिएका झोलाहरू पङ्क्तिबद्ध रूपमा राखिएको देखिन्छ। अधिकारीहरूले घटनाको वास्तविक कारण र सुरक्षा मापदण्ड पालना भए–नभएको विषयमा विस्तृत अनुसन्धान अघि बढाएका छन्।
