मधेस प्रदेशमा मलको अभाव चुलिन थालेपछि किसान चिन्तित
जनकपुरधाम, २४ वैशाख – मधेस प्रदेश मा फेरि रासायनिक मलको अभाव चुलिन थालेपछि किसान चिन्तित बनेका छन् । मकै, चैते धान र उखु खेतीका लागि आवश्यक समयमा मल नपाउँदा उत्पादन घट्ने डर किसानहरूले व्यक्त गरेका छन् ।
धनुषाका किसान रामप्रसाद साह ले सरकारले कृषि उत्पादनलाई प्राथमिकता दिएको दाबी गरे पनि किसानलाई आवश्यक मल समयमै उपलब्ध गराउन नसकेको गुनासो गरे । त्यस्तै सर्लाहीका किसान अशोक झा ले बजारमा मल अभावसँगै कालोबजारी बढेको बताए । धनुषाको नगराइन नगरपालिकाका ज्योतिष चन्द्र झा का अनुसार सीमा क्षेत्रमा कडाइ बढेपछि भारतबाट मल ल्याउने विकल्प पनि बन्दजस्तै भएकाले यस वर्ष समस्या झन् गम्भीर बनेको छ ।
कृषि सामग्री कम्पनी लिमिटेड का मधेस प्रदेशस्थित कार्यालयका सूचना अधिकारी दिनेश शर्मा ले देशलाई वार्षिक १७ देखि १८ लाख मेट्रिक टन रासायनिक मल आवश्यक पर्ने भए पनि सरकारले ३ देखि ४ लाख मेट्रिक टन मात्र आयात गर्न सकेकाले अभाव दोहोरिएको बताए ।भूमि व्यवस्था, कृषि तथा सहकारी मन्त्रालय, मधेस प्रदेश का बाली विकास अधिकृत रविन बस्नेत का अनुसार बाहिरबाट मल आयातको सम्भावना न्यून भएकाले वैकल्पिक उपायबारे काम भइरहेको छ ।
कृषि सामग्री कम्पनीको तथ्याङ्कअनुसार चालु आवको साउनदेखि चैतसम्म मधेस प्रदेशमा युरिया २७ हजार ४३१ मेट्रिक टन, डीएपी १० हजार २१५ मेट्रिक टन र पोटास ४ हजार ७५८ मेट्रिक टनसहित कुल ४२ हजार ६२८ मेट्रिक टन मल मौज्दात रहेको छ । तर किसानको मागअनुसार आपूर्ति हुन नसक्दा विशेषगरी डीएपी मलको अभाव अझ बढ्न सक्ने बताइएको छ ।
