ललितपुरको ग्वार्कोमा बनाइएको ओभरपास औपचारिक रूपमा उद्घाटन
काठमाडौं, ६ असार – ललितपुरको ग्वार्कोमा निर्माण गरिएको ओभरपास शुक्रबार औपचारिक रूपमा उद्घाटन गरिएको छ। प्रधानमन्त्री केपी शर्मा ओलीको उपस्थितिमा काठमाडौं उपत्यका ट्राफिक प्रहरी कार्यालय प्रमुख एसएसपी नवराज अधिकारीले रिबन काटेर ओभरपास सञ्चालनमा ल्याएका हुन्।
भौतिक पूर्वाधार तथा यातायात मन्त्रालयका अनुसार उद्घाटनपछि सवारी साधनका लागि ओभरपास पूर्ण रूपमा खुला गरिएको छ। २०७८ साल फागुन १२ गते ठेक्का सम्झौता भएको यो परियोजना सम्पन्न हुन चार वर्षभन्दा बढी समय लागेको हो।
निर्धारित समयमै काम सक्न नसक्दा लागत करिब १४ करोड रुपैयाँले बढेको मन्त्रालयको भनाइ छ। सडक विभागअन्तर्गत गुणस्तर अनुसन्धान तथा विकास केन्द्रका प्रवक्ता प्रदीप भण्डारीका अनुसार सुरुमा करिब १७ करोड ६ लाख रुपैयाँमा निर्माण सक्ने लक्ष्य थियो।
तर अन्तिममा लागत ३१ करोड ४६ लाख रुपैयाँ नाघेको छ। निर्माण कार्य तोकिएको मितिमा नसकिने क्रम दोहोरिएपछि तीनपटक म्याद थप गरिएको थियो। अन्ततः २०८१ साल पुस ८ गते निर्माण सकिएको हो।
पुस–माघ महिनामा प्राविधिक समस्याका कारण करिब एक महिना निर्माण कार्य अवरुद्धसमेत भएको थियो। निर्माणमा ढिलाइ गरेबापत ठेकेदार कम्पनीले करिब १ करोड ४७ लाख रुपैयाँ हर्जाना तिर्नुपरेको प्रवक्ता भण्डारीले जानकारी दिए।
ग्वार्को ओभरपास अन्तर्गत २० मिटर स्पानसहित ४ लेनको पुल निर्माण गरिएको छ। साथमा बालकुमारी र सातदोबाटोबाट जोडिने गरी ५ सय मिटर लामो अप्रोच सडक पनि बनाइएको छ।
चक्रपथको बीचबाट सडक माथि उठाएर निर्माण गरिएको ओभरपासले मुनिबाट मंगलबजार–इमाडोलतर्फका सवारी साधनलाई सहज रूपमा गुड्न दिने व्यवस्था मिलाइएको छ। यसले क्षेत्रको ट्राफिक चाप कम गर्न मद्दत पुग्ने अपेक्षा गरिएको छ।
