ढोरपाटनमा फैलिएको दादुरा अझै नियन्त्रणमा आएन
बागलुङ, ३ फागुन – ढोरपाटन नगरपालिका मा फैलिएको दादुरा सङ्क्रमण नियन्त्रणका लागि व्यापक खोप अभियान सञ्चालन गरिए पनि अवस्था पूर्ण रूपमा नियन्त्रणमा आउन सकेको छैन। पालिकाका नौवटै वडामा स्वास्थ्यकर्मी परिचालन गरी १० देखि १९ वर्ष उमेर समूहका पाँच हजार ६५६ जना बालबालिका तथा किशोरकिशोरीलाई खोप लगाइएको छ।
ढोरपाटन–७, ८ र ९ का विभिन्न गाउँमा सङ्क्रमण देखिएपछि गत फागुन २९ गतेदेखि चैत १ गतेसम्म अभियान सञ्चालन गरिएको थियो। छुटेकाहरूलाई चैत ५ गतेसम्म बुर्तिबाङ अस्पताल बाट खोप दिइने जानकारी देवप्रकाश घिमिरे ले दिनुभयो। सङ्क्रमण नियन्त्रणका लागि विश्व स्वास्थ्य संगठन र प्रदेश जनस्वास्थ्य कार्यालय बागलुङ का टोलीहरू खटिएका छन्। हालसम्म सात जनामा सङ्क्रमण पुष्टि भइसकेको छ भने १०३ जना शङ्कास्पद बिरामी रहेको जनाइएको छ।
एक्काइस जनाको नमुना परीक्षणका लागि राष्ट्रिय स्वास्थ्य प्रयोगशाला पठाइएको छ। हाल बुर्तिबाङ अस्पतालमा २४ जना र बोबाङ स्वास्थ्यचौकीमा छ जना उपचाररत रहेका छन्। छुटेका बालबालिका तथा किशोरकिशोरीलाई विद्यालय तथा घरमै पुगेर खोप लगाउने तयारी गरिएको छ।
खोप अभियानले सङ्क्रमण नियन्त्रणमा सहयोग पुग्ने अपेक्षा गरिएको छ। “अधिकांश बालबालिका तथा किशोरकिशोरीलाई खोप लगाइसकेका छौँ, अब बाँकीलाई पनि खोप दिइनेछ,” घिमिरेले भन्नुभयो। सङ्क्रमण कम हुन थालेपछि करिब दुई सातापछि बन्द रहेका विद्यालय पुनः सञ्चालनमा आएका छन्।
ढोरपाटन नगरपालिकाका स्वास्थ्य प्रमुख भूमिश्वर शर्मा का अनुसार दादुरा सङ्क्रमितको उपचार र खोप अभियानपछि विद्यालय सञ्चालन गरिएको हो। गत फागुन २१ गते बोबाङ गाउँका केही बालबालिकामा लक्षण देखिएपछि नमुना परीक्षणका लागि पठाइएको थियो, त्यसपछि यहाँ दादुरा फैलिएको पुष्टि भएको थियो।
