भारतको केरलमा तीव्र गतिमा चलाइएको कारको ठक्करबाट तीन जनाको मृत्यु
भारत – भारतको केरलस्थित कोचिन अन्तर्राष्ट्रिय विमानस्थल नजिकै कारको ठक्करबाट तीन जनाको मृत्यु भएको छ। आइतबार बिहान मादक पदार्थ सेवन गरेर तीव्र गतिमा चलाइएको मिनी कूपर कारले स्कुटरलाई पछाडिबाट ठक्कर दिँदा दुर्घटना भएको हो। दुर्घटनामा वायनाडकी २१ वर्षीया देविका, पालक्काडकी २२ वर्षीया गोपिका र कर्नाटकका २१ वर्षीय इजाजको मृत्यु भएको प्रहरीले जनाएको छ। उनीहरू एउटै हस्तकला पसलमा कार्यरत थिए र एउटै स्कुटरमा सवार थिए।
नेदुम्बासेरी नजिकै विमानस्थलतर्फ जाने सडकमा बिहान करिब १ बजेर ४५ मिनेटमा दुर्घटना भएको हो। कारको ठक्करबाट सडकमा बजारिएका तीनै जनालाई उपचारका लागि नजिकैको अस्पताल लगिए पनि बचाउन नसकिएको प्रहरीले जनाएको छ।
दुर्घटनापछि कार चालक १९ वर्षीय सुहैल सजीवलाई प्रत्यक्षदर्शीले नियन्त्रणमा लिएर प्रहरीको जिम्मा लगाएका थिए। एरनाकुलम ग्रामीणका प्रहरी उपरीक्षक केएस सुदर्शनका अनुसार प्रारम्भिक अनुसन्धानमा चालकले मादक पदार्थ सेवन गरेको देखिएको छ। पुष्टि गर्न उनको रगत र पिसाबको नमुना सङ्कलन गरिएको छ भने लागुऔषध सेवन गरे नगरेको पनि परीक्षण गरिनेछ।
प्रहरीले चालकविरुद्ध गैरइरादतन हत्या अभियोग दर्ता गरेको जनाएको छ। साथै, पूर्वराजमार्गमा प्रतिघण्टा दुई सय किलोमिटरभन्दा बढी गतिमा कार चलाएको देखिने उनका इन्स्टाग्राम भिडियोसमेत फेला परेका छन्। चालकले यसअघि पनि तीव्र गतिमा सवारी चलाउने गरेको थियो वा थिएन भन्ने विषयमा अनुसन्धान भइरहेको छ। घटनाबारे थप अनुसन्धान गर्न प्रहरीले घटनास्थलको सीसीटीभी फुटेज, सामाजिक सञ्जालमा रहेका भिडियो र सवारीसाधनको फरेन्सिक परीक्षण गरिरहेको जनाएको छ।
