आज नवरात्रको तेस्रो दिन, माता चन्द्रघण्टाको पूजा आराधना गरिँदै
धार्मिक मान्यताअनुसार मस्तकमा घण्टी आकारको अर्धचन्द्र धारण गरेकी हुनाले देवीको नाम चन्द्रघण्टा रहन गएको हो। सिंहमा सवार हुने देवी चन्द्रघण्टालाई दस हात भएकी र विभिन्न अस्त्रशस्त्र धारण गरेकी देवीका रूपमा वर्णन गरिएको छ। उनको घण्टीको ध्वनिले दुष्ट शक्ति र नकारात्मक ऊर्जालाई नाश गर्ने धार्मिक विश्वास छ।
देवी चन्द्रघण्टाको पूजा गर्नाले दुःख, कष्ट र बाधा हट्ने तथा परिवारमा सुख, शान्ति र समृद्धि कायम हुने धार्मिक मान्यता रहेको छ। उनको आराधनाले भक्तजनमा साहस, आत्मबल, निर्भयता र विनम्रता बढ्ने विश्वास गरिन्छ। पूजाका क्रममा देवीलाई रातो फूल, फलफूल, चन्दन, धूप, दीप तथा दूध र दूधबाट बनेका परिकार चढाउने परम्परा छ। भक्तजनहरूले ‘ॐ चन्द्रघण्टायै नमः’ मन्त्र जप गर्दै देवीको पूजा आराधना गर्ने तथा दुर्गा सप्तशतीको पाठ र भजनकीर्तन गर्ने गर्दछन्।
नवरात्रका अवसरमा काठमाडौँ उपत्यकाका शोभा भगवती, नक्साल भगवती, गुह्येश्वरी, मैतीदेवी, दक्षिणकाली, भद्रकाली र बंगलामुखीलगायत शक्तिपीठमा भक्तजनको विशेष भीड लाग्ने गर्दछ। उपत्यकाबाहिर पनि धरान, भोजपुर, ताप्लेजुङ, गोरखा र दाङलगायतका विभिन्न शक्तिपीठमा भक्तजनहरू पूजाआजा तथा दर्शनका लागि पुग्ने गरेका छन्।
