कांग्रेसको १५औँ महाधिवेशनमा मतदान सुरु, ७ हजार ३१७ प्रतिनिधि सहभागी हुँदै

यसअघि खराब मौसम, प्राविधिक समस्या र मतपत्र छपाइमा भएको ढिलाइका कारण बिहीबार अपराह्नदेखि गर्ने भनिएको मतदान शुक्रबार बिहानका लागि सारिएको निर्वाचन समितिले जनाएको छ। निर्वाचन समितिका सदस्यसचिव राजु कटुवालका अनुसार मतदान दिउँसो ३ बजेसम्म जारी रहनेछ। महाधिवेशनमा ७ हजार ३१७ प्रतिनिधि मतदाता रहेका छन्।

निर्वाचन समिति संयोजक वरिष्ठ अधिवक्ता प्रेमबहादुर खड्काले रातिको समयमा मतदान गर्दा प्रतिनिधिहरूलाई कठिनाइ हुने भएकाले बिहानदेखि मतदान सुरु गरिएको बताउनुभएको छ। मतपत्रमा हस्ताक्षर गर्न ३२ जना वरिष्ठ अधिवक्ता खटिएको उहाँले जानकारी दिनुभयो। मतदानमा ढिलाइ भएपछि आज मतदान गर्न पाएका प्रतिनिधिहरू उत्साहित भएका छन्। दसैँ मनाउन घर फर्कनुपर्ने टाढाका प्रतिनिधिहरू मतदानपछि घर जाने तयारीमा रहेका छन्।